24. aprelī tīšsaistē nūtyka 20. atkluotuo latgalīšu rokstu volūdys i kulturviesturis olimpiade i nu 17. leidz 24. apreļam naklotīnē žureja izvērtēs 21. skotuvis runys konkursam “Vuolyudzāni” atsyuteitūs daildorbu videoīrokstus. Atkluotuo latgalīšu rokstu volūdys i kulturviesturis olimpiade i skotuvis runys konkurss “Vuolyudzāni” teik organizāti ar mierki školu jaunuotnis vydā popularizēt latgalīšu kulturys montuojumu i rūsynuot par jū interesi, nūstyprynuot izpratni par latgalīšu rokstu volūdu kai svareigu latvyskuos identitatis daļu i kulturys vierteibu.

Konkursam školuotuoji īsyuta sovu audziekņu īrunuotūs daildorbu videoīrokstus ar vajadzeigū informaceju. “Vuolyudzānūs” pīsadola pyrmsškolys vacuma bārni, 1.–12. klašu školāni, studenti, sagatavejūt div daildorbu – dzejis i prozys voi prozys i dzejis – fragmentus latgaliski.