2. martā pyrmū reizi Latvejis viesturē tika atzeimuota Nacionalūs partizanu bruņuotuos pretuošonuos atceris dīna. Tamā Bolvu nūvoda pošvaļdeiba organizieja vairuokus pasuokumus, tymā skaitā ari rekonstruātuo bunkura-bazneicys i pīminis zeimis Stompakūs paglobuotajim nacionalajim partizanim atkluošonu.

Par Nacionalūs partizanu bruņuotuos pretuošonuos atceris dīnu ir nūsaceits 2. marts, partū ka 1945. goda 2. martā Viļakys (bejušuo Abrinis) apriņča Stompaku pūra soluos nūtyka leluokuo kauja Latvejis nacionalūs partizanu kara viesturē. Tūreiz ap 350 Latgolys mežabruoļu izceineja gryutu kauju.

Dobys līgums “Stompaku purvi” ir unikala teritoreja ar dobys boguoteibom i kulturviesturiskū montuojumu. Pūra austrumu dalis soluos 2. pasauļa kara laikā beja īreikuota partizanu apmetne, kurei beja leluokuo Baltejā i Zīmeļeiropā. Tamā beja 24 bunkuri i vairuokys vierszemis byuvis. Iz nacionalūs partizanu apmetni dobys līgumā “Stompaku purvi” vad markāta styga, mytruokajuos pūra vītuos īreikuotys laipys. Izstaigojūt dobys stygu, var izzynuot ari par teritorejā dzeivojūšajim putynim, dzeivinīkim i augim.