Bolvu nūvodā 2021. godā pīdzeivuots viesturisks nūtykums latgalīšu rokstu volūdys byušonai publiskajā vidē – pyrmū reizi Latvejis viesturē pastateita vaļsts leiminī saskaņuota nūvoda ceļazeime, kurā sūpluok uzrokstam latvīšu literarajā volūdā “Balvu novads” var puorskaiteit nūvoda nūsaukumu ari latgalīšu rokstu volūdā “Bolvu nūvods”. Da ituo vītu nūruožu zeimis bejušys pošvaļdeibys leimiņa iniciativys, bet Bolvu nūvoda zeime ir pyrmuo taida, kas dabuojuse ari vaļsts leimiņa atbolstu i, golvonais, ari oficialu saskaņuošonu, kas vys tik nav bejs vīglys ceļs. Itys ir pyrmais taida veida precedents vaļstī, kod sūpluok literarā volūdā raksteitai zeimei ir ari uzroksts vītejūs runuotā volūdā, kam, cīši cerams, sekuos ari cytu Latgolys regiona nūvodu iniciativys. Īprīšk zeimem vītejā volūdā uzmaneibu davierse līvu kulturys puorstuovs Valts Ernštreits, nu vys tik jam naīsadeve dabuot saskaņuojumu, tai ka pyrmuo zeime latgaliski īkustynuos procesus na viņ Latgolā, nu ari cytur Latvejā. Vysa svareiguokais – zeime ir pīruodejums, ka vaļstī mainās ari latvīšu volūdys dažaideibys i boguoteibys uztvere – latgalīšu volūda i regionaluos sovpateibys kai taidys arviņ vaira teik uztvartys kai boguoteiba, na atškireiba, nu kurūs beitīs i iznycynuot.