Bronislavs Sprydzāns dzims 1941. goda 5. februarī Rēzeknis nūvoda Nagļu pogostā zemnīku saimē. Myužeibā nūguojs 2014. goda 1. aprelī. Nu 1968. goda 17. oktobra Bronislava Sprydzāna dorba vīta beja Latvejis Radeja. Bejs i vacuokais redaktors, i programu vadeituojs vysaidūs raidejumūs – “Dzirkstele”, “Mikrofons”, “Junda”, “Mūsmājas”, “Būt latvietim” i cytūs. Vysilguok – nu 1989. goda 2. apreļa leidz 2012. goda 11. oktobram – gataveits i vadeits raidejums “Latgale” (“Latgolys Vuords”), kurs skanēja i Latvejis Radejis pyrmajā, i ūtrajā, i catūrtajā programā. Paraleli tam nu 1990. goda jis paleidziejs veiduot cīši daudzu Latvejis mozuokumtauteibu kulturys bīdreibu programys, kai ari Latvejis Nacionalūs kulturys bīdreibu asociacejis raidejumu “Mēs visi”. Piec 2012. goda Sprydzāns turpynuoja dorbuotīs Latvejis Radejis uorštatā.