Grupa “Gandreiž 10nīkā” izdavuse sovu pyrmū albumu “Nasoki nikuo”. Albumā var dzierdēt devenis grupys izpiļdeituos dzīsmis, tymā skaitā ari jau leluoku popularitati sajāmušuos “Putneni”, “Ješka” i “Traktoru pavielnīks”. Vysu dzīšmu muzykys i tekstu autors ir Juoņs Kuzminskis (dzīsmē “Ehti” izmontuoti ari Ontona Slišāna vuordi), aranžiejumu i mix veiduojs Vitālijs Grišunovs.

Grupys liders Juoņs Kuzminskis stuosta, ka itys disks ir tik vīna daļa nu paradzātuo treiskuoršuo albuma. Taids formats izvālāts, partū ka “Gandreiž 10nīkā” sasakruojs ap 30-40 dzīšmu, kū salikt vīnā diskā nabyutu pruoteigai. Kotra albuma daļa tiks prezentāta atseviški.

2017. godā slternativuo pankroka grupa “Gandreiž 10nīkā” pīduovoje jaunu videoklipu dzīsmei “Bļaunu”.

Par dzīsmi grupys liders Juoņs Kuzminskis soka: “Dzīsme ir emoceju liduojums, kuruos ir īspiejams izbaudeit, dzīžūt nu vysys sirds. Tei ir kai aicynuojums vysim pīsabīdruot dzīduot i muzicēt,  dorūt tū vēļ lobuok. Video paruoda, kai grupa gaida busu, kurs vess jūs i aparaturu koncerttūrī, bet tuo vītā dažaidu apstuokļu dieļ atbrauc vacs opeleits. Grupys bīdri puorjam situacejis vadeibu sovuos rūkuos, i, prūtams, vyss beidzās laimeigai.”