Janīna Mičule dzymuse 1927. goda 26. janvarī, myužeibā nūguojuse 2014. goda 19. oktobrī. Janīna beja školuotuoja, tradicionaluos kulturys kruojieja i popularizātuoja, iggadeja etnografiskuo ansambļa “Rikova” vadeituoja. 1954. godā dybynuotais ansamblis ir vīns nu senejuokūs folklorys kolektivu Latvejā, ansambļa dybynuošonys īrūsynuotuoji beja folklorys pietnīks Jānis Rozenbergs, školuotuojs Jāzeps Liepiņš i kluba vadeituoja Tekla Ikauniece. Ansamblī nu pošys dybynuošonys laika jei dorbuojās gon kai daleibneica, gon kolektiva vadeituoja, veicynojūt latgalīšu volūdys saglobuošonu, nacionaluos pošapzinis ceļšonu, patriotisma uzturiešonu i sekmejūt vierteiguo latgalīšu etnografiskuo montuojuma puormontuojameibu nu paaudzis paaudzē.