Majā nūtykušuo Latgolys symtgadis kongresa (4. pasauļa latgalīšu saīta laikā) svātku programu papyldynuoje literari muzykals pasuokums “Latgalīšu volūdys nakts”, kurymā pyrmū reizi ar taidu “maratonu” sasatyka latgaliski dzīduotys dzīsmis i skaiteituo literatura.

Savīnojūt divejis kongresa dīnys i divejis kongresa nūtikšonys vītys nu 5. maja 18.00 vokora da 6. maja 9.00 reita Rēzeknis Festivala parkā vysu nakti skanēje latgalīšu volūda – latgaliski dzīduotuos dzīsmis i latgaliski runuotais vuords, režisora Viestura Kairiša īcerē simboliski tū saucūt par sovpateigu Juoņa dīnys guņkuru – latgalīšu volūdys napuortryukšonys cyldynuošonys simbolu. Iz skotuvis kuope latgalīšu literati i dažaidu stilu muziki. Pasuokumu vadeja Kristaps Rasims, Māris Susējs, Jurs Vucāns i Rolands Keišs. “Latgalīšu volūdys nakts” tyka translāta LMT Straumē.