Svātku nūdūms beja kūpeigā muzykys i muokslys pasuokumā aplīcynuot Latgolys kulturys vierteibys, radūšū goru i spylgtū ideņtitati. Svātki nūtyka, gatovojūtīs Latvejis vaļsts symtgadis svineibom, kai vīns nu Latgolys kongresa symtgadis pasuokumim.

Pyrms Svātkim tyka atlaiseitys skaneiguokuos latgalīšu dzīsmys ar aicynuojumu bolsuot par sev teikamuokū dzīsmu, kū cylvāki gryb dzierdēt pasuokumā. Iz bolsuojuma pamata tyka izveiduota pasuokuma programma.

Svātkūs pīsadaleja 70 kolektivi nu vysys Latgolys. Kūpā ar kūrim, folklorys kūpom, vokālajim ansambļim muzicēja Igauņu saimis ansamblis, grupys – “Borowa MC”, “Dabasu durovys”, “Bez PVN”, “Sovvaļņīks”, “Ausmeņa records”, “Tautumeitas”, solisti – Andris Baltacis, Guntra Kuzmina, Agate Jermaļonoka, Sandis Ulpe, Laura Bicāne, Artūrs Uškāns. Gostūs beja īsaroduši i ar myusim latgaliski sadzīdova Renārs Kaupers i Jānis Aišpurs.

Eipaša vīta Svātkūs tyka atvālāta Latgolys muokslinīkim Silvai Linartei, Anatolijam Zelčam, Aivaram Pīzelim, Vijai Stupānei, Ilzei Griezānei, kuri sovys gleznys radeja taisni dzīsmu laikā. Gleznuošonys procesu skateituoji varēja nūsavērt iz leluo ekrana.

Pasuokuma dīnā tyka reikuots arī muokslys pleners, kurā pīsadaleja jaunūs muokslineicu apvīneiba “V.I.V.A.”, Špoģu i Naujenis Muzykas i muokslys školu audziekni.

Svātkus reikova Daugavpils nūvoda dūme sadarbeibā ar LR Kulturys ministrejis Latvejis vaļsts symtgadis biroju i Latgolys nūvodu pašvaļdeibom.