Latgolys reģionaluos televizejis latgaliskī projekti ir vīni nu svareiguokuom nūtikšonom 2021. godā, par tū, ka ar latgalīšu volūdys izskaneišonu medijūs – calts i styprynuots tuos prestižs, maineita sabīdreibys izpratne, ka latgaliski runoj na viņ sātā, bet ari iz īlys, institucejuos, pasuokumūs i vys kur cytur, tei ir dzymtuo volūda i tū kasdīnā lītoj ari bārni i jaunīši, volūda popularizeita vysā Latvejī i uorpus tuos. 2021. goda zeimeiguokīs projekts ir raidiejumu cykla saimem ar bārnim “Žik!” trešuos sezonys izveide. Itymā godā piļneibā maineits raidiejuma formats i tys veļteits na viņ bārnim, bet ari pusaudžim, vaira rūceibys dūts tuo jaunuokajai vadeituojai – vinpadsmitgadeigajai Adrianai Goroščakai, kas kūpā ar žurnalisti Ausmu Sprukti gasteja 24 dažaiduos Latgolts vītuos i apsavēre taidus tematus kai medijprateiba, doba, autpyuta, uzjiemiejdarbeiba, kasdīna laukūs, talanti i pasuocīns. Adriana ari poša raidiejuma gaitā interveja cylvākus i pīsadaleja vysaiduoku uzdevumu piļdeišonā, skateituoji minē bārnu sacereitys meiklis. Kotram nu sešim jaunīm raidiejumim izveiduota reklama, fotografejis, aproksti, kai ari smīkleiguokī momenti aba kuriozi publiceiti vysuos LRT socteiklu lopuos, cyklam “Žik!” veļteitā lopā. Saleidzynūt ar paguojušū godu, sekuotuoju skaits lopai pīaudzs treis reizis. Safiļmeiti ari diveji jauni raidiejumi “Lobs ar lobu sasatyka…” par Ilūksti i Varakļuonim, administrativi teritorialū reformu, mediju vidi i pīdereibys vaicuojumim. Tai daruodūt, ka saturs latgaliski var byut ari analitisks, sataisieti ostoņi ziņu sižeti i diveji raidiejumi latgaliski par “Latgolys Kulturys programmys 2021” laureatim. Ausma Sprukte i puorejuo LRT komanda ari citūs ziņu sižetūs kanalā LTV 1, Re:TV i TV24 stand up runoj latgaliski, intervej latgaliski i tū ruoda raidiejumūs “Saudzēt, saglabāt, samīļot. Daba.”, “Autoveikalam pa pēdām”. LRT ir vīneigīs televizejis medijs, kas paruoda tik daudzi latgaliskuo na viņ Latgolā, bet vysā Latvejī.