2021. godā spylga i ražeiga personeiba latgaliskajā kulturā beja literate, publiciste i projektu vadeituoja Ilze Sperga. Jei beja redaktore divejim nūzeimeigim literarim dorbim – Valentina Lukaševiča dzejis kruojumam “Pādi nava svāti” i Oskara Seiksta “Vokora vuordi draugim”, kai ari Valentina Lukaševiča eseju kruojumam “Casnāgu maizeitis”, kas izguojs 2022. gods pošā suokumā. Taipat izguojuse juos pošys dzejis gruomota i dzīšmu albums bārnim “Vuškeņa iz pļovys” i struoduots pi dzejis kruojuma pīaugušajim “Rudiņa bolsi”, kura izīšona paradzāta 2022. gods suokumā. Vīns nu goda nūzeimeiguokajim nūtykumim bejs ari Ilzis stuostu kruojuma “Dzeiveiba” puortopšona radejis lasejumu formatā, kas 2021. gods decembrī izskanēja Latvejis Radejis eterā i tyka par pyrmajim piļneibā latgaliskajim radejis lasejumim. Ilze poša bejuse aktiva ari ar jaunu dorbu publiciešonu – dabuojuse trešū vītu konkursā “Latgolys prozys skaitejumi 2021”, taipat vēļ da ituo napublicāta Ilzis stuosta fragmens skanēja kai pīktuo pasauļa diktata latgalīšu rokstu volūdā teksts. Ilze Sperga bejuse tei personeiba, kurei aktivi viestej i stuosta par situaceju latgalīšu literaturā plašuokai sabīdreibai kūpejā Latvejis kulturā. Intervāta žurnalam “Ir”, Latvejis Radejai, pīsadalejuse sarunu festivalā “Lampa” nūtykušajā diskusejā par latgalīšu literaturu. Nūzeimeigs bejs ari 2021. godā padareitais dorbs – Ilzis sarunys ar latgalīšu literatim i tūs jaundorbu pyrmpubliciejumi portalā lakuga.lv ar mierki stuosteit vaira par latgaliski rokstūšim autorim. Nu 2021. gods apreļa da decembra reizi mienesī Ilze sagatavejuse vīnu stuostu-sarunu par kaidu autoru. Intervāti: Dagneja, Marija Dzeisla, Laura Melne, mygluojs, Mārīte Slišāne, Valentins Lukaševičs, Annele Slišāne i Ingrida Tārauda.