Dzīsme “Valereja Seile” ir pushuliganisks centīns alternativā manīrē īpazeistynuot klauseituojus ar vēļ vīnu izcylu latgalīšu sabīdriskū darbineicu Valereju Seili. Reizē dzīsmē teik pīmynāts i kuortejū reizi “izvasts nu skapa” ari “vadūņs” Kārlis i nazkodejais Latvejis uorlītu ministrs Vilhelms Munters. Dzīsme suokumā planavuota vīglā tvista manīrē, nu, struodojūt pi aranžiejuma, tykuse pi jaudeiga pankroka skaniejuma.

Apvīneiba “Kapļi” ari 2017. godā aktivi koncertieja, kai vīnys nu leluokom uzastuošonom atzeimejūt koncertu Latgalīšu volūdys naktī, festivalā “7 Hills” i Rēzeknis nūvoda dīnuos 2017.