“Dzejis dīnu – 2022” programā 10. septembrī nūtyka pyrmais dzejis slams latgaliski “Rogovkys dzejis voga”. Dzejis slams ir dzejis kusteiba, kas Latvejā i pasaulē (starptautiski zynoma kā “Poetry slam”) atdzeivynuojuse interesi par myusdīnu dzeju. Slama pamatā ir nūsaceita dzejnīku sacenseiba: autori losa sovus dorbus, bet žurejis i skateituoju bolsuojumā teik nūskaidruots uzvarātuojs. Dzejis slama nūsaukumā “Rogovkys dzejis voga” simboliski sasavij septembra pyrmuo puse, kod laukūs parosti ir ražys nūvuokšonys, eipaši kartupeļu laseišonys, laiks i dzejnīku sacenseiba. Leidzeigi kai kartupeļu vogā, kur atzineibu izapeļnej dreizuokais i čakluokais laseituojs, tai i slamā uzvar tys, kurš ar sova dorba patīsumu i emocionalitati puorlīcynoj žureju i skateituojus. Dzejnīku snīgumu viertēja žureja (dzejneice i publiciste Anna Rancāne, Dr, philol. Ilga Šuplinska, Latvejas Radio Latgolys studejis vadeituoja Renāte Lazdiņa, latvīšu volūdys i literaturys školuotuoja, LVLKŠA vadeituoja Veronika Dundure i latgalīšu kulturys ziņu portala lakuga.lv redaktore Laura Melne) i skateituoju bolsuojums.

Itaids pasuokums Latgolā nūtyka pyrmū reizi, i tei ir novitate dzejis popularizeišonys aktivitatēs. Jaunā i savdabeigā veidā skateituoji īpazyna latgalīšu dzeju. Slamā pīsadaleja 9 latgalīšu dzejnīki, kas ir jau pazeistami voi beja kai jaunatkluojums. Pasuokuma daleibnīki nūruodeja, ka slams atdzeivynuojā “steivū”, jau īrostū Dzejis dīnu formatu. Īpaši nūzeimeigi, ka dzejnīku sacenseibu klausejuos i viertēja daudz jaunīšu, kuri redzēja, ka latgalīšu dzeja ir myusdīneiga, interesanta, ka latgalīšu volūda ir bogota.