Saimu folklorys studeja “Garataka” ir nu Reigys, bet jūs repertuarā koncertūs i īrokstūs vysod ir kaida vīta latgaliski dzīduotom dzīsmem.

2017. godā pyrmū albumu izdavuse saimu folklorys studeja “Garataka”, kurymā sasapuļciejušys Reigys saimis, kurom saknis vaicojamys vysūs Latvejis nūvodūs. Studejā vacuoki izzynoj i īsavuica sovys lokaluos tradicejis (dzīsmis, muzyku, īražys, tautystārpus), sasateik mieginuojumūs, brauc lauka pietejumūs, pīsadola nūmetnēs i ituos zynuošonys nūdūd tuoļuok sovim bārnim, ar kurim kūpā dorbojās studejā tuos vadeituojis, jaunuos i spylgtuos etnomuzikologis Asnatis Rancānis vadeibā. Albuma īrokstā pīsadalejuši 24 leli i mozi studejis dalinīki nu deveņu saimu. “Garatakys” albumam dūts nūsaukums “Laukā”. Tai kai vīna nu folklorys studejis iņterešu ir rudzu pļaušona i tuos tradicejis, albumā īskaņuotūs dzīšmu lela daļa sasasauc ar itū tradiceju, deļ tuo ari albumam taids nūsaukums. Albumā vydā ir 15 dzīšmu nu dažaidu Latvejis molu. Pīcys dzīsmis albuma skaņ ari latgaliski. Dzīsmis latgaliski par dorbu i tautuos īšonu ir nu Rēzeknis, Škilbanu, Baļtinovys i Ludzys.