7. oktobrī, kod nūtika III pasauļa diktats latvīšu volūdā, Latvejis Radejis Latgolys studejis veiduotais raidejums “Kolnasāta” pīduovoje sevkuram puorbaudeit latgalīšu rokstu volūdys zynuošonys, uzrokstūt diktatu latgaliski.

Diktatu Latvejis Radejā 1 skaiteja jaunatnis lītu specialiste Leila Rasima, skanēje fragments nu latgalīšu literatis Ilzis Spergys gruomotys “Dzeiveiba”. Pīraksteitū tekstu piečuok kotrys pats varēje puorbaudeit Latgalīšu kulturys ziņu portalā lakuga.lv. Diktata teksts tyka sastuodeits, īvārojūt Vaļsts volūdys centra 2007. godā apstyprynuotūs Latgalīšu raksteibys nūsacejumus.

Īsadvasmojūt nu pasauļa diktata latvīšu volūdā, ideja par diktatu latgalīšu rokstu volūdā rodusēs raidejuma “Kolnasāta” producentei Vinetai Vilcānei. “Itūšaļt daudz teik dareits latgalīšu volūdys saglobuošonā i atteisteišonā. Latgalīšu volūda ir daļa nu latvīšu volūdys, kas ir na mozuok vierteiguoka i skaneiguoka par latvīšu literarū volūdu. Volūda ir dzeiva na tik runā, nu ari rokstūs. Nasaverūt iz tū, ka vareibys īsavuiceit latgalīšu rokstu volūdu ir īrūbežuotys i daudzi tū nav vuicejušīs školā voi ari ir īsavuicejuši pošvuiceibys ceļā, cylvāki nasakautrej tamā raksteit, eipaši jaunuokuo paaudze. Tys ir tik laika vaicuojums, kod pareizi latgaliski rokstūšūs cylvāku skaits pīaugs. Iz tū tīcūtīs i dūmūt stimulu zynuošonu uzlobuošonai, aicynojam puorbaudeit asūšuos latgalīšu rokstu volūdys zynuošonys, pīrokstūt diktatu latgaliski. Diktats latgaliski radejis ēterā skanēs pyrmū reizi,” stuosta Vilcāne.