Sastdiņ, 6. martā, 21.05 LTV eterā, kai ari LSM.lv i REPLAY.lv tīšraidē nu Latgolys viestnīceibys GORS byus nūsaverama Latgalīšu kulturys goda bolvys “Boņuks 2020” padūšonys ceremoneja, kurā tiks nūskaidruoti 10 bolvys sajiemieji par padareitū latgaliskajā kulturā 2020. godā. Šudiņ, 1. martā, suocīs ari bolvys publikys simpatejis bolsuojums, iz kuru aicynoj lakuga.lv i lsm.lv.

Trešū godu Latgalīšu kulturys goda bolvys “Boņuks” padūšonys ceremonejā izzynuosim ari publikys simpateju bolsuojuma bolvys – Žyka – sajiemieju. Itūgod bolsuot par sovu favoritu nu vysu 30 “Boņuks 2020” nominantu aicynoj Latgalīšu kulturys ziņu portals lakuga.lv i Latvejis Sabīdryskūs medeju portals lsm.lv. Bolsuojums suocīs šudiņ, 1. martā, 10 stuņdēs reita portalā lsm.lv i byus da pīktdīnis, 5. marta, divejom stuņdem piecpušdīnē (plkst. 14.00), bet bolvys sajiemiejs tiks paziņuots ceremonejā 6. marta vokorā. Bolsuot par sovu favoritu par vīnu reizi dīnā, autorizejūtīs ar sovu socialūs medeju profilu voi e-postu.

Bolsuot var ite: https://www.lsm.lv/raksts/kultura/kulturtelpa/noverte-spilgtako-kas-paveikts-latgaliskaja-kultura-sacies-balvas-bonuks-publikas-balsojums.a394363/

Publikys simpatejis bolsuojuma uzvarātuojs ari itūgod sajims keramikis Kristīnis Nicmanis (Jašys pūdi) taiseitū muola statueti, kurymā atveiduots Boņuka suņs Žyks, kurs ari tyka īpazeists car režisora Juoņa Streiča kinu “Cylvāka bārns”, kas baļsteita taida poša nūsaukuma rakstnīka Juoņa Klīdzieja romanā i ir bolvys nūsaukuma īdviesmis olūts.

Vysa leluokuo publikys atbolstu i “Žyka” bolvu obejuos īprīškejuos reizēs sajēme kulturys viestneica, školuotuoja, rūkdarbneica i tautystārpu darynuotuoja Iveta Seimanova.

Leidza ar 10 bolvys sajiemiejim i publikys simpateju bolsuojuma uzvarātuoju, Latgalīšu kulturys goda bolvā “Boņuks 2020” itūgod par myuža īguļdejumu latgalīšu kulturys atteisteibā tiks gūdynuots ari keramikis i dzejnīks Voldemārs Voguls.

Latgalīšu kulturys goda bolvu “Boņuks” reikoj Latgolys viestnīceibys GORS komanda. Vaira par bolvu: http://bonuks.lv.

Atguodynojam, ka bolvys “Boņuks 2020” nominanti ir (alfabeta parādā):

1. Aldis Bukšs ar pyrmū romanu latgaliski „Bruoli”
2. Andryva Jūrdža 175. jubilejis goda aktivitatis
3. Bilingvalais dzejis kūpums „Pādejais modeļs”
4. Daina Kraukle ar gruomotu „Dienvidlatgalē austās segas”
5. Folklorys kūpa „Upīte” ar aktivitatem, albumu „Padzīdam i…” i videoklipim
6. Grupa „Dabasu Durovys” ar albumu „Perimetrs” i tuo prezentacejis koncertim
7. Grupa „Inde Indive” ar EP „Mater Omnium” i debejis albumu „II”
8. Grupa „Tautumeitas” ar albumu „Dziesmas no Aulejas” i koncertdarbeibu
9. Grupa „The Sound Poets” ar dzīsmi „Tik lānai kai munys dūmys”
10. Grupa „Varang Nord” ar dzīsmi „Svietneica”
11. Gustavs Manteifels „Poļu Inflantija (Inflanty Polskie)”
12. Izdavums „Muna dzīšmu gruomota”: notu gruomota, koncerts „Dzīšmu gruomota” i latgalīšu dzīšmu stuosti
13. Kina „Laiki. Cylvāki. Volūda”
14. Koncertizvadums „Latgolys freska”
15. Latgalīšu rakstnīceibai veļteitais raidīroksts „Puslopys”
16. Ligija Purinaša i Kaspars Strods „Laikmeta nospiedumi: 20. gs. Latgales stāsti”
17. Lipskis/Justs/Arbidāns ar albumu „Taids džezs”
18. „Ludzas igauņu valodas ābece”. Sastateituojs Uldis Balodis
19. Muzykys i aiļu festivals „Upītes Uobeļduorzs” pyrmū reizi breivdobā
20. Ontona Kūkuoja 80. jubilejis goda nūtikšonys, gruomota „Mīlesteiba. Lelais Līpu kolns” i dzejis izruode „Pa mīlesteibu brīnūt, kuojis nasaļ”
21. Postfolklorys grupa „Rikši” ar koncertdarbeibu, albumu „trīp!” i videoklipim
22. Publiciste i latgalīšu volūdys entuziaste Vineta Vilcāne
23. Radejis raidejums „Pīci breinumi 2.0”
24. Raidejums „Latgales ciematu stāsti: nezināmais par zināmo”
25. Raidejums „Literatūre”: Anna Rancāne i Ontons Rupaiņs
26. Tradicionalūs saļmu i bēru dzīšmu kruojums „Saļmes Stērnīnē”
27. Youtube kanals „Im a’mazed”
28. ŪGA. Albums „LG ir HH”
29. Viesturnīks Kaspars Strods
30. Viesturs Kairišs i kina „Piļsāta pi upis”