5. i 6. majā Rēzeknē nūtyka 4. pasauļa latgalīšu saīts “Latgolys symtgadis kongress”. Latgolys kongresa symtgadis svineibys 5. majā aizasuoce ar dīvkolpuojumu Rēzeknis Vyssvātuokyos Jezus sirds katedralē, piec tam sekuoje svātku guojīņs i pīminekļa “Latgolys kongresam 100” atkluošona. Piec pušdīnem sekuoje 4. pasauļa latgalīšu saīta plenarsēde, vokoru nūslēdze “Latgalīšu volūdys nakts”. Kongresa ūtrajā dīnā dorbs nūtyka vairuokuos paraleluos sekcejuos. 6. maja vokorā pījēme 4. pasauļa latgalīšu saīta rezoluceju, kurā latgalīši izsaceja sovys vēlmis i redzīni par tuoluokū reiceibu attīceibā iz latgalīšu volūdu, kulturu, izgleiteibu i cytom regionam svareigom sferom.

“Latgolys symtgadis kongress” beja leluokais nūtykums, kas izskanieja vysā Latvejī, saisteibā ar latgalīšu volūdu i latgalīšu kulturviesturi. Itys pasuocīņs deva īspieju atkluotiai izrunuot latgalīšu volūdys vaicuojumu i Latgolas tuoļuokys attiesteibys vaicuojumus. Itys byus luobs suokums Latgolys uzplaukumam.