4. septembrī Rēzeknis nūvoda Rogovkā ar koncertuzvadumu “Suprātka Kuorklinīkūs jeb Andryvam Jūrdžam – 175”svinēja izcyluo latgalīšu kulturys darbinīka Andryva Jūrdža 175. dzimšonys dīnu. Pasuokumā pīsadaleja vītejī pošdarbnīki i postfolklorys grupa “Rikši”, koncertuzvadumu varēja vērtīs ari tīšraidē  Facebook.com.

Andryvs Jūrdžs (1845–1925) ir vīns nu nūzeimeiguokūs i zynomuokūs Latgolys nacionaluos atmūdys dalinīku. Andryvs bejs cīši apduovynuots, pošvuiceibys ceļā apgivs vairuokys svešvolūdys, kas cīši nūderēja, tulkojūt dažaidus materialus i padūmus latgaliski, puorrakstejs Svātūs Rokstus, pīrakstejs sokamvuordus, tautysdzīsmis, nūvāruojumus, kai ari rakstejs originaldzejūļus. A. Jūrdža ar rūku skolu gaismā pīraksteituos gruomotys beja pat ap tyukstuš lopu bīzys, tuos tyka izplateitys vītejūs ļaužu vydā. Drukys aizlīguma godūs tom beja lela nūzeime Latgolys latvīšu izgleituošonā, jo gruomotu īspīsšona latgaliski tūreizejā Vitebskys guberņā beja aizlīgta.