Grupys “Inde Indive” mozalbums “Mater Omnium”, kas beja prīškviestness dreiži piec tuo izguojušajam grupys albumam “II”. Mozalbumā īkļautys četrys kompozicejis – treis, kuruos īraksteitys 2012./2013. godā, bet tūs apstruode pabeigta viņ itūgod, kai ari taids kai “post scriptum” dalykts vīns improvizacejis īroksts nu 2012. goda aprelī nūtykušuo mieginuojuma, kab klauseituoji saprastu, kai veidojās grupys muzyka. Ari albumā “II” īkļautys četrys kompozicejis, itūreiz gon nivīna nu tūs nav latgaliski. Albuma “II” kompozicejis īraksteitys 2012./2013. godā, bet tūs skanis apstruode pabeigta 2020. godā. Albuma muzykalū saturu veidoj melanholiski tymsi, apjūmeiga garuma (kūpejais albuma skaniejums 40 minuti) skaņdorbi, kas ītārpti alternativuo roka, postroka i postmetala skaniejumā. Albums nūklausoms digitalā formatā platformā Spotify.

Jau stuosteits, ka grupa “Inde Indive” sovulaik bejuse ari vīna nu Latgolys jaunuos muzykys atmūdys grupu, sūpluok “Bez PVN”, “Dabasu Durovys”, “Green Novice” i cytom. Dažys dzīsmis sovulaik publycātys grupys muzykys profilā socialajā teiklā “draugiem.lv”, nu leidz pyrmajam īroksta publiciejumam gaideits cīši ilgi. Grupys sastuovs itūs godu laikā ir mainejīs vairuokys reizis, nu kūduls palics namaineigs – grupā muzicej Uģis Vilcāns i Edgars Vylcāns, bet nu 2008. goda grupys bundzinīks ir Valdis Metlāns (arī grupu “Green Novice” i “D-Light” bundzinīks). Nu 2009. da 2013. goda grupys basgitarists beja Kārlis Josts (niu grupys “The Sound Poets” dalinīks), kuruo izteiktais melodiskums caurvej īrokstus – taišni taidā sastuovā sovulaik padareits vyss studejis dorbs.