Etnomuzykys grupa “Tautumeitas” izdavuse jaunu albumu, kuram dūts nūsaukums “Skrejceļš” i tymā apkūpuotys 14 dzīsmis. Grupys jaunais albums taiseits kūpā ar ilglaiceigū grupys muzykys producentu Reini Sējānu i zvīdru producentu Povelu Olsonu, kurs pyrma tuo struoduojs ari ar grupu “Prāta Vētra”. Dzīsmei “Rūziņu duorziņā”, kurys vuordus sovulaik teikuse Anna Brokāne Kaunatys apleicīnē (pīraksteiti 1930. godā), ir animacejis stylā taiseits videoklips, kurā muokslineica Terēze Talita Rozenblate īvejuse Ukrainys tautys simbolus.

Jaunuos dzīsmis “Muoseņa” videoklips filmāts 2021. goda rudinī, nu kai klipa prezentacejā atzyna “Tautumeitas” līdere Asnate Rancāne, tod tam jau ir taida pavasara sajiuta. Klips radeits Vacpībolgys apleicīnē lauku sātā “Vectūļi”, kurai ir vaira nakai 200 godu seneja viesture. Videoklipa režisors ir Helmuts Bondars, bet operators Gatis Indrēvics. Dzīsme “Muoseņa”, kurys tekstā sasavej latgalīšu tautysdzīsme i Renāra Kaupera teksts, bet muzyku radejuši Asnate Rancāne, Renārs Kaupers i ari dzīsmis producents Povels Olsens.

Par dzīsmi “Vīna ūtrai”: “Itei ir dzīsme, kū veļtejom vīna ūtrai pateiceibā par vysu kūpā pīdzeivuotū gondreiž ostoņu godu garumā. Asam palykušys par saimi, kas atbolsta i stutej vīna ūtru, kod vajadzeigs. Sovpus prīcys i laimis šaļts kūpā pīdzeivojam ar seškuorteigu jaudu,” par dzīsmi stuosta grupys “Tautumeitas” vadeituoja Asnate Rancāne. Leidzeigi par dzīsmi intervejā portalam Lakuga.lv stuosta ari juos grupys dalineica Aurēlija Rancāne: “Kotra nu myusu ir cytaiduoka, ar sovu ūdzeņu. Mes tai cīši veiksmeigai vīna ūtru papyldynojam. Myusu dzīsme “Vīna ūtrai” i jaunais videoklips tai ir taišni par itū temu – kai asam bejušys i vysod byusim vīna ūtrai. Taida eipašuo meitiņu draudzeiba – muoseiba.”