Nu 22. da 25. februara, pyrmū reizi ari skateituojim Rēzeknis teatrī “Joriks” beja vareiba redzēt Mārtiņa Eihis Latgolys pūdnīceibai veļteitū īstudiejumu “Muols”. “Muols” ir ūtrais teatra īstudiejums, kurymā dzierdama ari latgalīšu volūda.

Teatra izruode “Muols”, kurys režisors ir ari Rēzeknis teatra “Joriks” muokslinīcyskais vadeituojs Mārtiņš Eihe, atkluoj Latgolys pūdnīceibys procesus – kai teik dabuots i gataveits veiduošonai dereigs muols, kai nūteik cepļa kūršona, kai atdzymuse Latgolys malnuo keramika, kai var izavuiceit par pūdnīku, kai sūpluok sadzeivoj jaunuo i tradicionaluo keramika i cyti vaicuojumi, bet jo eipašu vītu izruodē ījem muokslys zynuotnīka, Latgolys keramikys viesturis pietnīka Juoņa Pujāta (1925–1988) personeiba i darbeiba. Izruode baļsteita intervejuos ar myusu dīnu keramikim i stuostūs par jau myužeibā nūguojušajim Latgolys pūdnīkim. Izruodis laikā, īelpojūt muola smuordu i pīsaskarūt tam, skateituoji tiks aicynuoti pīsadaleit ceļuojumā nu aizviesturis da myusu dīnu, nu muola pikuča da suču, nu bārna, kurs bejs iz vīnu keramikys nūdarbeibu, da muokslinīka, kurs materalam atdevs vysu sovu dzeivi.

Izruodē “Muols”, kas topuse 2021. goda rudinī, nu īrūbežuojumu deļ ar skateituojim sasatiks viņ 2022. godā, pīsadaleja akteri Juoņs (Jānis) Kronis (KVADRIFRONS) i Liena Šmukste, kuru obeju dzymtys saknis vaicojamys Latgolā – Juoņa Gaigalovys i Kolupa pusē, jis ir ari Juoņa Pujāta muosys mozdāls, Lienai Leivuonā.