Latgolys kongresa laikā Latgolys viestnīceibys GORS 2. stuovā beja apsaverama izstuode “Lobs ar lobu sasatyka”. Tys beja vīns nu Latgolys kongresa atkluošonys pasuokumu 27. aprelī, pasasokūt bīdreibys “Latgolys etnografiskuo viestnīceiba” vadeituojis Ivetys Seimanovys iniciativai.

Latgalīšu ideņtitate nasastuov tikai nu volūdys, kū lītojam, nu dzīšmu, kū dzīdim, nu svātku, kurūs svietejam. Latgalīša ideņtitati aplīcynoj i drēbis, kū asam caur godu symtim iznasuši i saglobuojuši da myusu dīnu. Itai tradicejai ir svareiga atteisteiba i nūdūšona jaunajom audzem.

Nu izstuodis atkluošonys Latgolys kongresā aprelī lelis ir izceļuojušys pa daudz i vysaidom vītom. Kai stuosta poša Iveta: “Maņ beja svareigi, kab suokumā lelis tyktu atruodeitys tepat Latgolā.” Nu Rēzeknis lelis brauce iz Preilim, Daugovpili i piečuok iz Kuorsovu, taipoš lelis gastejušys ari Raiņa muzejā “Jasmuiža” Preiļu nūvodā. Taipat izstuode devusēs iz Reigu – iz E. Smiļģa muzeju.

Iz E. Smiļģa muzeju atceļuojušys jau 47 lelis. Kai stuosta Iveta, tod šyut vēļ varātu daudz, tok, īspiejams, paliks pi 55 leļu, kab kotram nūvodam byutu pa lelei, tymā skaitā ari Sielejis kulturviesturiskajam nūvodam.