Juram Urtānam, izmontojūt jaunys pīejis reljefa pietejumūs, sasadarbojūtīs ar plošom interesentu grupom, uz vītas pietejūt i apsekujūt īspiejamūs piļskolnus, pādejū četru godu laikā Latvejā ir nūtics sprodzīnveideigs piļskolnu skaita pīaugums. Saleidzynojūši dreiži monografiskā veidā ir apkūpuota informaceja par 2018. – 2021.g. ar aeroskaniešonas jeb LIDAR paleidzeibu atklōtim 76 īprīkš nazinomim piļskolnim. Ir izveiduots jaunatkluotū piļskolnu apkūpuojums, kas īvad zynōtniskā apritē piļneigi jaunu materialu. Tys byus pamats tuoļōkai seņviestures izziņai, vītejuos i nacionaluos identitatis veiduošonā i styprynuošonā. Agruok beja īspiejams struoduot ar datim par apmāram 400 Latvejis piļskolnim; niu J. Urtāna darbeibas rezultatā Latvejys piļskolnu skaits pīaudzs par gondreiž 1/5. Latgolā vīn piļskolnu skaits pīaudzs par napilnu trešū daļi – atkluots 51 īprīkš nazynoms piļskolns. Piec pādejim atkluojumiem Latgolā niu zynomi 180 piļskolni, i Latgola ir Latvejis piļskolnim boguotuokais apgobols. Pietejumi i atkluojumi ir plaši publicāti regionalajā presē. 2022. goda suokumā izdūta Jura Urtāna monografeja par jaunajim piļskolnim.
Jurs Urtāns Latveju sauc par piļskolnu zemi: “Piļskolni ir vizuali vysnūzeimeiguokais Latvejis arheologiskūs pīminekļu veids, kam ir na tik zynuotniskuo atslāga nūzeime kai arheologiskajim izpietis objektim, bet ari nūzeime lokaluos identitatis i nacionaluos pošapzinis veiduošonā, tuos atteisteibā i styprynuošonā, kulturviesturiskajā ainovā i turisma produktu veiduošonā. Beidzamajūs četrūs godūs, pasasokūt publiski daīmamim aerolazerskeniešonys datim, ir nūtykuse spruodzīņveideiga piļskolnu jaunatkluošona – atkluots apmāram tikpat daudz jaunu piļskolnu, cik īprīškejūs 70 godūs. Itei gruomota veļteita jaunatkluotajim piļskolnim, kai turpynojūt īprīškejūs pietnīku izveiduotū piļskolnu publiciešonys tradiceju, tai īvodūt zynuotniskā apritē jaunus, īprīšk nazynamus Latvejis piļskolnus. Kab saglobuotu saikni ar īprīšk publicātajom piļskolnu apkūpuojuma gruomotom, itymā izdavumā īkļauti ari tī nadaudzī piļskolni, kas beja jaunatkluoti jau pyrma LIDAR erys suoku”.