Alberts Budže dzims 1930. goda 26. janvarī Reigā. 1957. godā veiskups Pīters Strods jū īsvietejs par prīsteri. Nu 1991. goda kolpuoje Tiļžys i Ruguoju draudzēs, bejs ari Baļtinovys i Škilbanu draudžu pravests. Myužeibā pravests nūguoje 2017. goda 25. oktobrī. Albertu Budži aizruove Latgolys kulturviesturis i pasauļa nūtikšonu sakareibu vaicuošona, jis pieteja dominikaņu, jezuitu i cytu goreigūs ordiņu darbeibu Latgolā, Latgolys vītvuordu saisteibu ar cytu vaļstu vītvuordim, vuoce materialus i pīraksteja aprokstus par īvāruojamim i aizmierstim prīsterim. Sajamūt viesti par izsaceitū atzineibu, pravests īrostajā pīticeibā nūsceja: “Nikuo taida jau es naasu darejs! Naasu ni deputats, ni ministrys, ni veiskups. Vysus šūs godus tik asu darejs sovu dorbu. Vyss ir dareits Dīva gūdam! Ļūti interesanti ir pieteit sovu paguotni.”