2020. goda novembra suokumā ceļu pi skaiteituoju suoce bīdreibys “Hronologeja” izdūtuo popularzynuotniskuo gruomota par Latgolys viesturi – “Laikmeta nospiedumi: 20. gadsimta Latgales stāsti”.  Tuos autori, literate Ligija Purinaša i viesturnīks Kaspars Strods, gruomotā apkūpuojuši 37 stuostus par vysaidim nūtykumim, personeibom i socialim procesim 20. godsymta Latgolā.

„20. g. s. sovā ziņā ir bejs vysaids, taipat kai tī stuosti, cylvāki i nūtykumi. Tys ir bejs cīši trauksmains i maineigs. Ari cylvāki, kas tymā dzeivuoja, jo mes jau parosti izceļam viesturē zynuomuokūs ļauds – Fraņcs Kemps, Fraņcs Trasuns, Valereja Seile i tml., bet stuostus veidoj ari vīnkuoršī cylvāki… Tys beja laiks, kurā vīnkuoršs lauku puiss, īrauts tuo laika politiskajuos, militarajuos i vysaiduos cytuos peripetejuos ir klivs par vīnu nu 20. godu symta Latgolys viestnešim – Stanislavs Stiureņs. Jis dīnieja Latvīšu legionā nu 43. goda. Juo liktiņs, saprūtams, ir tragiskys, kai jau daudzim I pasauļa kara laikā dzeivojūšim cylvākim. Prūtams, mums ir personeibys, vysaidi inženeri, arhitekti, politiki. Kas maņ personeigi redzīs vīna nu gruomotys interesantuokuom sadaļom, tī ir tuo laika socialī procesi. Jā, jo mums jau nabeja tikai kongresi, beja ari taida līta kai nūzīdzeiba i cītumi, ari vysaidi napateikami nūtykumi. Par pīmāru, stuosts par Varakļuonim 1925. goda augustā. Tī beja kai ba parosts kauteņš, kas golā izavierš par taidu lelu, sabīdreibā plotu rezonansi izsaucūšu nūtykumu. Aizguoja leidz pat Saeimai,” stuosta viesturnīks Kaspars Strods, atkluodams, ka daudzi nu stuostu raksteiti jau paseņ i leidz šam ir cytūs medejūs publicāti, bet niu tī ir puortaiseiti i papyldynuoti.

Gruomota, kura paver īspieju nu jauna atkluot Latgolu – tai autori, Ligija Purinaša i Kaspars Strods, raksturoj sovu dorbu “Laikmeta nospiedumi: 20. gs. Latgales stāsti”. Gruomotys puslopuos ir 37 atškireigi stuosti, kurūs teik apsprīstys personeibys, institucejis, nūtikšonys i cytys interesantys temys, kas paruoda Latgolu īspiejams cytā gaismā nakai īrosts.