Latgolys regionaluos televizejis (LRT) i žurnalistis Ausmys Spruktis-Kozulis latgaliskī projekti ir vīni nu svareiguokuom nūtikšonom 2022. godā, par tū, ka ar latgalīšu volūdys izskaneišonu medejūs – calts i styprynuots volūdys prestižs, maineita sabīdreibys izpratne, ka latgaliski runoj na viņ sātā, bet ari iz īlys, institucejuos, pasuokumūs i vys kur cytur i tei ir dzymtuo volūda, kuru kasdīnā lītoj ari bārni i jaunīši, volūda popularizeita vysā Latvejī i uorpus tuos. 2022. goda zeimeiguokīs projekts ir raidiejumu cykla saimem ar bārnim i pusaudžim “Žik!” caturtuos sezonys izveide. Itymā godā otkol piļneibā maineits raidiejuma formats i sūpluok ar škoļneicu Adrianu Goroščaku gasteits pi ostoņu profeseju puorstuovim, kai ari talanteigim bārnim, paruodeita vysaiduoku puļceņu darbeiba. Kotram raidiejumam ir reklamys latgalīšu volūdā, fotografeju galerejis i presis relizis, kai ari smīkleiguokī momenti aba kuriozi. Kotrs raidiejums i juo materiali sasnāguši aptyvai 110 000 lelu mierķauditoreji. Goda nūgalī sataiseiti veļ deveni jauni raidiejumi, kur vairums interveju i žurnalistes Ausmys stand up izskaņ latgaliski – “Latvijas pierobeža. Dienasgrāmata.” – par Subati, Demeni, Indru, Šķauni, Šuškovu, Brigim, Leidumnīkim, Baļtinovu i Žīgurim. Tai paruodūt, ka saturs latgaliski var byut ari analitisks. LRT izveiduo ziņu sižetus latgalīšu volūdā par “Latgolys Kuļturys programys 2022” laureatim, salyka jūs treis raidiejumūs i ari tī Ausma Sprukte-Kozule pīsoka jūs ar stand-up paleidzeibu taišņi latgaliski. Taipoš ari citūs ziņu sižetūs kanala LTV1 raidiejumā “Dienas ziņas”, “Panorāma”, kai ari ziņuos Re:TV i TV24 kanalūs – stand up jei poša pec sovys iniciativis turpynoj runuot latgaliski. Intervejis latgaliski sižetūs īkļauj ari puorejuo LRT komanda. LRT ir vīneigīs televizejis medijs Latgolā, kas tik lelu viereibu pīvierš taišņi latgalīšu volūdai, tradicejom, nūtikšonom i cylvākim, i paruoda itū raidiejumūs, kai ari ziņu sižetūs na viņ Latgolā, bet vysā Latvejī.