Jau daudzejus godus iz pasauļa ļauds izmontoj vysaiduokys geopoziciniešonys programmys, kai ari vysaiduokys mobiluos aplikacejis, lai atrostu ārtuokū celi da golamierķam. Latvejā vīna nu popularuokūs ir “Waze” aplikaceja. Jei jau paseņ ir daejama ari latvīšu literarajā volūdā. Vairuokus godus tyka raudzāts dabuot kontaktus ar ituos aplikacejis izstruoduotuojim i pīduovuot tai sataiseit latgaliskū verseji, tok tys nikai naizadeve. Leidz 2020.godā tūmār saguo nūdybynuot kontaktus i savstarpejuos sarunuos tyka panuokta vīnuošonuos, ka programai “Waze” tiks izstruoduots audio materials, lai kotrs lītuotuojs var ārtuok lītuot aplikaceji, kai ari vysu aplikacejis “interfeisu” aba programā lītuojamū volūdu vysaiduoku uzstatejumu sareguliešonai byus īspiejams izlikt latgalisku. Latgalīšu entuziastu grupa kērēs pi dorba. Piec drusku vairuok kai goda (2021.gods pavasarī), puorvarūt vysaiduokus pandemejis izlyktūs apgryutynuojumus i starptautiskuos komunikacejis leiklūčus, Waze latgaliskuo verseja izalauze cauri škārsteikla labirintim i niu ir breivai daejama kotram kuļdinīka ci kaidys cytys gudruos īreicis lītuotuojam. Napylna goda laikā Waze latgaliskuo verseja ir īgivuse naskaitamys pozitivys atsauksmis. Ļauds tū lītoj, prīcojās i vys stuosta par itū aplikaceji citim!