“Tautumeitas” ir tradicionaluos muzykys grupa, kurei rodusēs 2015. godā i apvīnoj 6 mārgys, nu kurūs leluokai daļai ir etnomuzykologejis izgleiteiba. 2017. gods ir bejs cīši spylgts grupys rodūšojā darbeibā – uzastuojušys “Boņuks 2016” i “Laiks Ziedonim” ceremonejuos, ar grupu “Auļi” izbraukuojušys Latveju vierīneigā koncertturē, pīsadalejušys šovā “X-faktors”, kai ari uzastuojušys daudzi cytuos nūtikšonuos kai Latgolā (Latgalīšu volūdys nakts, Muokslys pikniks Lūznovā i c.), tai puorejā Latvejā, vysod koncertūs dzīdūt ari latgaliski, kas ir grupys repertuara naatjemama daļa.

Ni “Auļi”, ni ari “Tautumeitas” Latvejis muzykys laukā poši par sevi niu komentarus naprosa, bet obejis spieceiguos muzykaluos apvīneibys niu ir dzierdamys ari vīnā kūpeigā albumā, kurymā vydā ir 13 dzīšmu. Albumā teik izspālāts i izdzīduots cylvāka dzeivē svareigais preceibu i kuozu pūsmys. “Auļu” kuliņu i bungu styprais skaniejums puorstuov veiriškū spāku, bet “Tautumeitas” ar izteikti maiguoku skaniejumu, nu vys tik spāka pylnū daudzbaļseigū dzīduošonu, puorstuov sīviškū. Taipat kai dzeivē jaunam puoram piec kuozu ir juoīsavuica sadzeivuot, kab vīns napuormuoktu ūtra, tai i muzykā “Auļi” i “Tautumeitas” vaicoj saskanis, vīnam ūtru papyldynojūt.