Novembra beiguos Lūznovys muižā attaiseišonys svātkus pīdzeivuoja Vinsenta Flikigera zeimiejumu i Edeitis Husaris eisūs stuostu gruomateņa “Trusīni vessim reitā pi puiša”. Gruomotā apkūpuoti šveicīšu muokslinīka Latgolys īdvasmuoti zeimiejumi i tim veļteitī stuosti par Latgolu, aizdūdūt vaicuojumu, kas regionā ir tys, kas pīsaista cyttautīša skotu, bet vītejim līk dūmuot, kas nu ituo laika paliks tuoļuokajam. Gruomotā puorskaitomī stuosti publicāti trejuos volūduos – latgaliski ar tulkuojumim angliski i vuociski.

Izdavuma “Trusīni vessim reitā pi puiša” idejis autors ir šveicīšu muokslinīks i muzikis Vinsents Flikigers (Vincent Flückiger). Jis, pasasokūt dzeivisbīdrei, latvīšu čellistei Ilzei Grudulei, jau daudzus godus regulari gastej Latvejā, Latgolā, jādz latvīšu volūdu i vuicās latgalīšu. Dorbojūtīs pasauļa muokslinīku teiklā “Urban Sketchers”, Vinsents regulari fiksej vidi sev apleik – tai 2015. godā roduos zeimiejumu sereja “Latgale laiku ritā”, kurā pamatā īmyužynuota Stiernīnis apleicīne. Kab zeimiejumus papyldynuotu ar koč kū teksta formatā, Vinsents uzrunuojs latgalīšu kulturys aktivisti, portala lakuga.lv vadeituoju Edeiti Husari, kurei, īsadvesmojūt nu muokslinīka dorbu, pīrakstejuse 20 eisus i kūdūleigus stuosteņus par Latgolys šudiņdīnu.