Vitoldam i Antoninai Milaševičim ir lels nūpalns koru muzykys atteisteibā Latgolā pādejuos desmitgadēs. Bez obeju izcylūs personeibu davuma i jūs audziekņu sasnāgumu nav īdūmuojama Latgolys pādejuo godu symta koru kulturys aina. Dirigenti vysod veicynuojuši i populariziejuši latgalīšu tautysdzīsmis skaniejumu, īkļaušonu koru muzykys repertuarā i rūsynuojuši komponistus veiduot latgalīšu dzīšmu apdaris.

Antoninys (dz. 1938. g.) dzymtuo puse ir Baļtinova, Vitolda (dz. 1942. g.) – Aglyuna. Vitolds i Antonina sasatyka Rēzeknis muzykys vydsškolā i nu tuo laika i saimis klopotys, i rodūšūs dorbus dola iz pusem.

Antonina Milaševiča paraleli studejom Latvejis Vaļsts konservatorejis Kordirigiešonys nūdaļā uzsuoka dorba gaitys Rēzeknē. Nu 1960. goda struoduojuse par dirigiešonys pedagogi Rēzeknis muzykys vydsškolā, izvuicejuse jaunu latgalīšu dirigentu paaudzi, vadejuse dirigentu vuiceibu kori. Vuiceibu laikā i vāluokajūs godūs dzīduojuse vairuokūs korūs i ansambļūs, vairuokus godu desmitus bejuse koru dirigente.

Vitolds Milaševičs 1960.gadā īsastuojs Rēzeknis Muzykys vydsškolys Kordirigentu nūdaļā. Veseleibys i finansialuo stuovūkļa deļ nav saguojs studēt Latvejis Vaļsts konservatorejā, nu, atīmūt nu armejis, suocs struoduot par školuotuoju. 1976. godā izveiduojs puišu kora klasi, kurū vadejs da 1993. goda. Vitolda bejušī audziekni palykuši par prasmeigim i talanteigim muzykys pedagogim i dirigentim. Sadarbeibā ar dirigenti Ruotu Salmiņu 1988. godā izveiduojs jaunīšu kori “Ezerzeme”, leidzdorbuojīs cytūs korūs. Sovys pedagogiskuos darbeibys laikā veics nūzeimeigus sasnāgumus bārnu koru kulturys leimiņa ceļšonā.

Dirigenti soka, ka nikod nav izjutuši greizsirdeibu pret ūtra dorbu voi panuokumim. Taišni ūtraiž, vysu myužu jī vīns ūtram ir bejuši leluokais atspaids – i rodūšajā, i ari saimis dzeivē.