Fotomuokslinīku i fotoviesturnīku Igoru Pliču vyslobuok raksturoj Imanta Zieduoņa vuordi – “garaiņs, kas veicynoj vuoreišonūs”. Igors Pličs ir itaids namīra gors, kurs i fotografej, i dybynoj Latgolys fotografu bīdreibu, i vuoc, pietej, stuosta i ceļ gaismā ituo nūvoda foto viesturi. Jis ir fundamentaluos gruomotys “Latgales fotogrāfi laika ritumā XIX—XXI gadsimtā” (2021) idejis i koncepta autors. Gruomotā ir apkūpuota informaceja par vaira nakai 344 Latgolā struodojūšim fotografim, puori par 2000 fotografejis nu 1858. gods leidz pat myusu dīnom. Latgola ir vīneigais Latvejis nūvods, par kuru izguojs itaids enciklopedisks vuokums. Par itū nūzeimeigū veikumu Igors Pličs i juo školuotuojs, fotoviesturnīks Pīters Korsaks sajēme Latgalīšu kulturys goda bolvys “Boņuks 2021” nominaceju.

Igora Pliča dorbi zynomi vysā Latvejā i puori tuos rūbežu kai nu izstuožu, tai nu Latgolys kulturys viesturei nūzeimeigom  kulturviesturiskajom monografejom: “Latgales rakstu gaismā”, “Ai, māte Latgale”, “Latgales kultūras vēsture”, “Latvijas Luterāņu dievnamu šodiena”, “Es dziedāšu par tevi”, “Latgale un tās ļaudis”. Jis ir leidzadorbuojs, izdevs voi ilustriejs 25 gruomotys, nūzeimeiguokuos nu tūs – “Latgale fotogrāfijās” (2013), “Latgalietis XXI gadsimtā” (2017).

Dzims 1954. godā Reigā, bierneibys godus pavadejs Bolvu nūvoda Tiļžā, bet leluokū myuža daļu nūdzeivuojs Preiļūs. Fotografa izgleiteibu sajiems Reigys 34. orūdškolā, piec tam struoduojs Ludzys, Rēzeknis i Preiļu fotoatelje, kur taisejs biļdis i kuozom, i kolhoza pyrmrindnīku gūda dielim, i partejis bīdru kartem, kai ari pat cyuku pasem. Lauku zāns vysu laiku profesionali pylnveiduojīs – pasyutejs specializātū fotoliteraturu, studiejs fototehnologejis Moskovys politehnikumā. Fotografs ir struoduojs vysūs īspiejamajūs žanrūs, tok vysmeiluokuo jam asūt dobys ainova. Nūzeimeigs ir ari Igora Pliča sabīdryskais veikums – jis organizej foto konkursus, reikoj izstuodis, dybynoj privatū muzeju ar senlītu i Latgolys fotoviesturis ekspoziceju, izveiduoja Juoņa Gleizda pīminis ustobu, renovēja vacuokū kūka sātu Preiļūs, kai ari pogolmā pastateja Latvejā mozuokū dīvnomu, nazkod nūsadorbuoja ar uzjiemiejdarbeibu.