BOŅUKS 2016 bolvys sadaleitys

2017. goda 26. februarī, Rēzeknē, Latgolys viestnīceibā GORS, svineigā ceremonejā tyka paziņuoti Latgalīšu kulturys goda bolvys „Boņuks 2016“ sajimieji – eipašuokuos nūtikšonys, aktivitatis i ļauds latgalīšu kulturā 2016. godā.

Literaturys kategorejā bolvu par lobuokū snāgumu literaturā sajieme Sandra Ūdre i Juoņs Ryučāns ar literatam, politikim i kulturys darbinīkam Frančam Kempam veļteitū romanu „Aizlauztais spaits“ – romans latgaliski myusdīnu latgalīšu kulturā ir cīši reša i deļ tuo jo eipaša nūtikšona. Par 2016. goda lobuokū izdavumu/gruomotu atzeits izdavums „Škilbanu sīvas“, kas veļteits Zīmeļlatgolys tradicionalajai dzīduošonai i Viļakys nūvoda Škilbanu pusis dzīduotuoju gūdynuošonai, izdavumā viestejūt kai dzīduotuoju dzeivisstuostus, tai dzīduošonys tradicejis aprokstu i dzīšmu materialu notuos i audio īrokstā.
2016. gods bejs ražeigs latgalīšu muzykā, kurymā iz vysa leluokuo konkurence jau vaira godu ir tradicionaluos muzykys nominacejā, kurymā kai pārnejuo goda lobuokū snāgumu žureja nūviertieja tradicionaluos dzīduošonys grupys „Saucējas“ padareitū koncertūs i izdavumā „Trīci, munu ustabeni!“, kas veļteits Kuorsovys i Ludzys apleicīnis tradicionalajai dzīduošonai. Kai goda debitanti bolvu sajieme grupys „Dabasu Durovys“ lidera Arņa Slobožanina vadeituo mārgu grupa „Piparmētra“, kas 2016. godā bejusi cīši aktiva – kai koncertejūt, tai īrokstūt dzīsmis i sataisūt videoklipu dzīsmei „Elpoj“. Par 2016. goda lobuokū snāgumu akademiskajā muzykā žureja atzyna Reigys kamerkora „Muklājs“ padareitū albumā „Ar laimeņu runojūt“ – tymā apkūpuotys dažaidūs laikūs topušys latgalīšu tautysdzīšmu apdaris i originaldzīsmis. Kai aktivuokī šlagermuzykys laukā bolvu sajieme grupa „Dvinskas muzikanti“ par dzīsmis „Hei, bruoļ latgalīt“ sasnāgumim, bet bolvys par lobuokū videoklipu dzīsmei „Sirds. Sirds. Sidrs“, kurymā gona humorpylnys ironejis par šlagermuzyku, i lobuokū snāgumu alternativajā muzykā sajime projekts „Jezups i Muosys“, kas ir Latvejā labi zynuomuos latgalīšu grupys „Bez PVN“ dalinīku projekts. Kai lobuokais snāgums pop/rock muzykā, pošai žurejai gon drupeit mulstūt par nominacejis nūsaukumu attīceigajam muzikim, nūvārtāts Sovvaļnīka padareitais albumā „Napaseitynuots“. Itūgod vaira natyka padūta bolva nominacejā „Radejis hits“, jo dīvamžāļ bolvys reikuotuojim saīt atzeit, ka jauna muzyka latgaliski Latvejis radeju stacejuos gondreiž naskaņ ci skaņ cīši reši.
Īrosts, ka iz vysa plašuokuo bolvys sadaļa tradicionali ir par sabīdryskū aktivitati i sasnāgumim aba kategorejā „Sabīdreiba i kultura“. Nūviertejūt kai vaira godūs padareitū, tai taišni 2016. goda dorbus par goda amatnīku/saiminīku tyka atzeiti Preiļu tierdznīceibys centra „Ūga“ saiminīki Ingūna i Aigars Zīmeli, kurī latgaliskū napagaisynoj i popularizej ari myusdīneigajā lelveikalu nūzarē. Par lobuokū snāgumu vizualajā muokslā nūvārtāts muokslineicys Dainys Salminis padareitais 2016. godā, struodojūt gon ar latgalīšu gruomotu, gon latgaliskūs nūtikšonu plakatu i logotipu muokslinīcyskū radeišonu, bet kai lobuokais snāgums skotivis muokslā gūdynuota Rēzeknis Tautys teatra izruode – nu lītaunīku volūdys latgaliski puormeituo Daivys Čepauskaitis luga „Pupas“. Bolvu nominacejā „Goda snāgums audiovizualajā muokslā“ sajieme Latvejis Televizejis eiskinu konkursa „Latvijas kods“ dalinīki, režisora Daiņa Kļavys i scenareja autora Gunta Bojāra dokumentaluo kina par latvīšu volūdys dažaideibu – „Runātāji“. Bolvu par latgalīšu volūdys populariziešonu itūgod sajieme latgalīšu kulturys ziņu portals Latgalīšu kulturys gazeta LaKuGa.lv, kas ir vīneigais portals pasaulī, kurīs kasdīnys publicej piļneibā latgaliski raksteitys viests. Trešū godu tyka padūta bolva nominacejā par latgalīšu kulturys populariziešonu Latvejā i pasaulī, nūviertejūt nominantus, kas latgalīšu kulturu popularizej na tikai latgaliski, i tū sajieme režisora Juoņa Ozoliņa-Ozola dokumentaluo kina „Likteņzeme“ (kinu studeja RIJA), kas viestej par Amerikys latgalīša Pītera Ragauša sasatikšonu ar rodim Latgolā i Sibirī, viestejūt slovonuo Latgolys dižgora Andriva Jūrdža dzimtys liktini. Par pārnejuo goda „Goda cylvāku“ latgalīšu kulturā tyka atzeita latgalīšu kulturvidis vīna nu ituos šaļts vysa spūžuokūs personeibu, filologejis profesore Ilga Šuplinska, bet kai svareiguokuo nūtikšona latgaliskajā kulturā 2016. godā tyka sveicynuota Latvejis Radejis Latgolys multimedeju studejis atkluošonu, pasasokūt kurys aktivajai darbeibai par nūtikšonom Latgolā i vysā Latvejā izzynuoj bīžuok i vaira. Ceremonejis nūslāgumā kai vīns nu aizkustynūšuokūs breižu beja bolvys „Par myuža īguldejumu latgalīšu kulturys atteisteibā“ padūšona dirigentu i školuotuoju puoram Antoninai i Vitoldam Milaševičim, kurūs radūšais myužs ir nūzeimeigs īguļdejums Latgolys i Latvejis kulturā – bez obeju izcylūs personeibu davuma i jūs audziekņu sasnāgumim nav īsadūmuojama Latgolys pādejuo godu symta koru kulturys aina. Dirigenti vysod veicynuojuši i populariziejuši latgalīšu tautysdzīšmu skaniešonu, īkļaušonu koru muzykys repertuarā i rūsynuojuši komponistus taiseit latgalīšu dzīšmu apdaris.
Bolvu padevieju, nu kurūs rūku tyka sajimti Boņuki, itūgod beja volūdneica Lidija Leikuma, muziki Renārs Kaupers i Goran Gora, fotografe Iveta Vaivode, muzikis, žurnalists i reklamys sferys specialists Aigars Runčis, Latvejis Nacionaluo kulturys centra vadeituoja Signe Pujāte, šova „Īstās latvju saimnieces“ dalineica, zyrgu sātys „Klajumi“ saimineica Ilze Stabulniece, režisors Viesturs Kairišs, fonda „Viegli“ puorstuove Žaneta Jaunzeme-Grende, rakstneica Inga Ābele, režisors Jānis Streičs, komponists Andrejs Selickis, varganiste Iveta Apkalna i cyti.
Ituo goda Latgalīšu kulturys goda bolvys „Boņuks 2016“ padūšonys ceremoneju kuplynuoja latgalīšu muziķu prīšknasumi – ceremonejā uzastuoja „Dabasu Durovys“, Sovvaļnīks, Guntra Kuzmina, „Piparmētra“, „Tautumeitas“, „Rikši“, folklorys kūpa „Upīte“, Laura Bicāne, „Jezups i Muosys“, „Jubilāri“, bet ceremonejis nūslāgumā izskanieja veiru kora „Graidi“ i puorejūs muziķu i skateituoju kūpdzīsme, Valža i Māra Muktupāvelu saraksteituo „Pīmiņ, bruoļ!“.
Ceremoneju beja vareiba pīdzeivuot na tik kluotīnē, Latgolys viestnīceibys GORS Lelajā zalē, bet ari tīšraidē, kū nūdrūsynuoja lītuotne „LMT Straume“, kurymā kotrys grybātuojs varēs nūsavērt ari ceremonejis video īrokstu.
Latgolys viestnīceiba GORS, Latgalīšu kulturys goda bolvys „Boņuks 2016“ organizātuoji, aicynoj kotru interesentu jau niu sekuot leidza latgalīšu kulturys nūtikšonom 2017. godā, kab dasaceitu bolvai i gūdynuotu dasmytajā Latgalīšu kulturys goda bolvys „Boņuks“ ceremonejā 2018. goda 25. februarī. Itys gods Latgolai ir jo eipašs, jo leidza ar Latgolys kongresa symtgadis nūtikšonom aprelī i majā teik suokta Latvejis symtgadis svieteišona.
Latgalīšu kulturys goda bolvys „Boņuks“ mierks ir veicynuot latgalīšu kulturvidis saglobuošonu i atteisteibu, kai ari apkūpuot i gūdynuot spylgtuokūs i nūzeimeiguokūs sasnāgumus latgalīšu kulturā pārnejuo goda grīzumā. „Boņuks 2016“ nūtikšonu atbaļsteja Vaļsts kulturkapitala fonds, Rēzeknis piļsātys dūme, Rēzeknis nūvoda, Aglyunys, Baļtinovys, Bolvu, Cyblys, Dagdys, Kuorsovys, Ludzys, Rībeņu, Ruguoju i Viļakys nūvodu pošvaļdeibys. Informativī atbaļsteituoji: žurnals „Ir“, Latgalīšu kulturys gazeta LaKuGa.lv, Latgolys radeja, „Vaduguns” i „Latgales Laiks”.

Soki sovu

This site uses Akismet to reduce spam. Learn how your comment data is processed.

%d bloggers like this: