5 fakti par “Boņuks 2018” dīnu

  1. Ceremoneju vadeis Ēriks Zeps i Kozmens

Latgalīšu kulturys goda bolvys “Boņuks 2018” ceremoneju vadeis raidejuma “Kolnasāta” vadeituojs, postfolklorys grupys “Rikši” muzikis Ēriks Zeps i LTV šova “Supernova” finalists, raidejuma “Īsakūd Latgolā” vadeituojs Kozmens (Mārtiņš Kozlovskis). Koč ari tyka izziņuots, ka itūgod bolvu padūšonys ceremoneju vadeis komikis Juoņs Skutelis, vys tik saimis apstuokļu deļ itūreiz tys tai nasaīt, bet Juoņa “gors” ceremonejā byus kluotasūšs.

  1. Tīšraide vysā pasaulī

Ari itūgod nu sevkurys vītys pasaulī “Boņuks 2018” ceremonejai leidza sekuot varēs lītuotnis “LMT Straume” tīšraidē ite: http://straume.lmt.lv/lv/kultura/kultura/bonuks-2018/1037645, kai ari sabīdryskuo medeja portalā http://lsm.lv i ceremonejis sātyslopā http://bonuks.lv. Vydā storp pyrmū i ūtrū ceremonejis daļu LMT Straume tīšraidē byus nūsaveramys intervejis ar dažaidim ceremonejis gostim, tīšraidi vadeis Latvejis Radejis Pieci.lv raidejuma “Pīci breinumi” vadeituoji Anna Elīza i Edgars. Ka ir gribiešona ceremonejā byut kluotyn Latgolys viestnīceibys GORS Lelajā zalā, tod puora beleti iz ceremoneju ir sagiunomi ite: https://latgalesgors.lv/lv/bonuks-2018-latgaliesu-kulturas-gada-balva

  1. Izstuode byus bez sasatikšonys

Atcalta pyrma bolvu padūšonys ceremonejis īcarātuo sasatikšona ar muokslinīku Aigaru Bikšu. Tielnīkam vielejam izaveseļuošonu i veiksmeigu ceļu iz Japanu, kur jam nu pyrmūdīnis īcarāta mienesi ilga muokslys rezideņce. Bet izstuodi apsavērt Latgolys viestnīceibys GORS Muokslys galerejā varēs kai pyrma ceremonejis, tai storpbreidī i piec ceremonejis. Izstuodē apsaverami seši tielnīka dorbi, daļa nu kurūs topuse tepat Latgolā – Varakļuonūs, muokslinīka Raita Stiukys darbneicā.

  1. Desmit Boņuki i diveji vēļ

Planavuots, ka ceremonejā byus eisuoka nikai cytus godus. Itūreiz tiks padūti 10 Boņuki par padareitū 2018. godā, vīna bolva par myužā īguļdejumu latgalīšu kulturys atteisteibā, kai ari latgalīšu kulturys ziņu portala lakuga.lv skaiteituoju simpateju bolva. Ceremoneja taipat byus divejuos daļuos.

  1. Aļberts brauc gostūs pi Boņuka

Pyrma ceremonejis jau nu pušdīnis laika Latgolys viestnīceibā GORS “kiupēs” gudrī pruoti Kuorsovys pruota spieļu “Aļberts” eipašajā “Aļberts brauc gostūs pi Boņuka” nūtykumā, kurymā byus vaicuojumi tik par Latgolu i Latgalīšu kulturys goda bolvu “Boņuks”. Vysys 15 komandu vītys ir aizpiļdeitys, bet pruota spieļu pyrmuos vītys sajiemiejim tiks na tikai uzvarātuoju gūds, bet ari īspieja padūt vīnu nu desmit “Boņuks 2018” bolvu.

 

Iz sasatikšonu 24. februarī!

Soki sovu

This site uses Akismet to reduce spam. Learn how your comment data is processed.