Sastdiņ, 4. martā, Latgolys viestnīceibā GORS Rēzeknē nūtiks Latgalīšu kulturys goda bolvys “Boņuks 2022” svineiguo ceremoneja, kurā tiks nūskaidruoti 10 bolvys sajiemieji par padareitū latgaliskajā kulturā 2022. godā. Nu 20. februara da 1. marta portali LSM.lv i lakuga.lv aicynoj atbaļsteit sovu simpateju – kaidu nu 30 bolvys pretendentu – bolvys publikys bolsuojumā “Žyks”.

Latgalīšu kulturys goda bolvys “Boņuks” ceremonejā niu jau pīktū reizi tiks nūskaidruots ari publikys simpatejis bolsuojuma bolvys – Žyka – sajiemiejs. Bolsuot par sev meiluokū nu vysu 30 “Boņuks 2022” nominantu aicynoj latgalīšu kulturys ziņu portals lakuga.lv i Latvejis Sabīdryskūs medeju portals LSM.lv. Bolsuojums suocās pyrmūdiņ, 20. februarī, 10 stuņdēs portalā LSM.lv ITE i byus da 1. marta pusnakšu, bet bolvys sajiemiejs tiks paziņuots ceremonejā 4. martā. Bolsuot par sovu favoritu var vīnu reizi dīnā, LSM.lv bolsuošonys sistemā autorizejūtīs ar sovu socialūs medeju profilu voi e-postu.

Bolsuot par sovu simpateju var ITE.

Bolsuojuma uzvarātuojs sajims keramikis Vēsmys Ušpelis taiseitū muola statueti – Žyku. Tymā radzams Boņuka suņs Žyks, kurs ari sovulaik plotuok tyka īpazeits car režisora Juoņa Streiča kinu “Cilvāka bērns”, kas baļsteita taida poša nūsaukuma rakstnīka Juoņa Klīdzieja romanā. Taišni Vēsmys i Aivara Ušpeļu darbneicā “Malny Wylky” Rēzeknis nūvodā tūp ari pošys “Boņuka” statuetis.

Publikys bolsuojumu “Žyks” latgalīšu kulturys ziņu portals lakuga.lv reikoj jau pīktū reizi. Divejis reizis publikys simpateju bolsu sajiemuse rūkdarbneica, tautystārpu entuziaste i “Latgolys etnografiskuos viestnīceibys” vadeituoja Iveta Seimanova, taipat bolvu sajiemuse folklorys kūpa “Upīte” i īrokstu studeja “Bigmaar’s Records”.

“Boņuks 2022” svineiguo ceremoneja 4. martā byus nūsaverama ari LTV1 eterā, kai ari LSM.lv i REPLAY.lv. Latgalīšu kulturys goda bolvu “Boņuks” reikoj Latgolys viestnīceibys GORS komanda. Vaira par bolvu – http://bonuks.lv.

Atguodynojam, ka bolvys “Boņuks 2021” nominanti (alfabeta parādā) ir:
1. Annelis Slišānis stuostu i dzejis kruojums “tuoraga stuosti. pīns”
2. Antoninys Masiļūnis “Povuoru gruomota”
3. Atjaunuotais nacionalūs partizanu bazneicys bunkurs Stompakūs
4. Bīdreibys “LgSC” darbeiba 2022. godā
5. Bīdreibys “Ludzas amatnieks” vuiceibu filmys par senejūs omotu prasmem i zynuošonom
6. Daņču gruomateņa – albums “Latgolys daņči i na tik”
7. Daugovpiļs teatra izruode “Spreideits”
8. Daugovpiļs Vīneibys noma “Tradiceju sāta”
9. Folklorys studejis “Banga” debejis albums “TALKA”
10. Grupa “Bez PVN” ar dzīsmem i videoklipim nu tūpūšuo albuma “PARALELI HORIZONTI”
11. Grupa “Muosys” ar debejis albumu “Ceļā”
12. Grupa “Rupuči” ar bārnim i saimem paradzātu YouTube kanalu latgaliski
13. Grupa “Tautumeitas” ar dzīsmem i videoklipim nu albuma “Skrejceļš”
14. Ivetys Seimanovys dorbu izstuode “Lobs ar lobu sasatyka” vysā Latvejā
15. Īstudiejums “Muols”
16. Jauna kulturvīta Daugovpilī – keramika Pētera Martinsona sāta
17. Juris Urtāns
18. Laima Jurča
19. Latgolys kongress
20. Ligijis Purinašys dzejis kruojums “pierobežas”
21. LRT žurnaliste Ausma Sprukte – Kozule
22. Myusdīnyu latgalīšu literaturys raidīroksts “Puslopys”
23. Myusdīnu latgalīšu tekstu korpuss “MuLa2022”
24. Nautrānu pogosta karte latgaliski
25. Pyrmais dzejis slams latgaliski “Rogovkys dzejis voga”
26. Pyrmais latgalīšu serials “FATI”
27. Valentina Lukaševiča eseju kruojums “Casnāgu maizeitis”
28. Vinsenta Flikigera i Edeitis Husaris stuostu gruomateņa “Trusīni vessim reitā pi puiša”
29. Vuiceibu kurss “Latgaliešu rakstu valoda” platformā “Tava klase”
30. YouTube kanals “Im a’mazed”