Nu 2. da 11. marta portali LSM.lv i lakuga.lv aicynoj atbaļsteit sovu simpateju i bolsuot par kaidu nu 30 bolvys pretendentu – izalaseit spūdruokū 2025. gods nūtikšonu, personeibu voi aktivitati latgalīšu kulturā.
Latgalīšu kulturys goda bolvys “Boņuks” svātku ceremonejā publikys bolsuojuma bolvys – Žyka – sajiemiejs tiks nūskaidruots ostoitū reizi. Ari itūgod bolsuot par sev meiluokū nu vysu 30 “Boņuka 2025” nominantu aicynoj latgalīšu kulturys ziņu portals lakuga.lv i Latvejis Sabīdryskuo medeja portals LSM.lv. Bolsuojums suocās pyrmūdiņ, 2. martā, portalā LSM.lv i byus da trešdīnis, 11. marta, 23.59. Bolvys sajiemiejs tiks paziņuots ceremonejā 14. martā Rēzeknē, Latgolys viestnīceibā “Gors”. Bolsuot par sovu simpateju var vīnu reizi dīnā, autorizejūtīs ar sovu socialūs medeju profilu voi e-postu. Bolsoj ite!
Bolvys “Boņuks 2025” sajiemiejus, individuali bolsojūt, diveju kuortu viertiešonā izsprīž vaira nakai 50 cylvāku – īprīškejūs gods uzvarātuoju, attīceigūs jūmu ekspertu, latgalīšu kulturys aktivistu, kai ari bolvys reikuotuoju puorstuovu – žureja, bet “Žyka” sajiemieja nūsaceišona ir taišni portalu LSM.lv i lakuga.lv skaiteituoju rūkuos.
Bolsuojuma uzvarātuojs sajims keramikis Vēsmys Ušpelis taiseitū muola statueti. Jamā paruodeits Boņuka suņs Žyks, kurs tyka īpazeits caur režisora Juoņa Streiča kinu “Cilvēka bērns”, kas baļsteita taida poša nūsaukuma rakstnīka Juoņa Klīdzieja romanā. Taišni Vēsmys i Aivara Ušpeļu darbneicā “Malny Wylky” Rēzeknis nūvodā tūp ari bolvys “Boņuks” statuetis. Pārņ par publikys simpateju palyka raidejumu cyklys “Pazudušū pādu retrospekceja – pīrūbeža”, sajamūt kai bolvys statueti, tai latgaliskūs lobumu kasti.
Latgalīšu kulturys goda bolvys “Boņuks 2025” ceremoneju 14. martā 18 stuņdēs varēs klauseitīs Latvejis Radejis 1 eterā, vērtīs LSM.lv i REPLAY.lv i ar atlyktū tīšraidi ari LTV1 eterā.
