Apbolvuoti Latglīšu kulturys goda bolvys „Boņuks 2019“ sajiemieji

Latgolys viestnīceibā GORS, kluotyn asūt Latvejis Republikys kulturys ministram Naurim Puntulim, nūsaslāguse svineiguo Latgalīšu kulturys goda bolvys „Boņuks“ padūšonys ceremoneja, kurymā gūdynuoti desmit aktivuokī, spylgtuokī i plotuokū rezonansi dabuojušuos latgaliskuos kulturys nūtikšonys, personeibys, aktivitatis 2019. godā. Bolvys sajēme pūdnīka Evalda Vasilevska pīminis izstuode i gruomota, Ligija Purinaša par dzejis kruojumu „Sīvīte“, izdavums par kordirigentis Terēzis Brokys myužu, dokumentaluo filma „Latgalīši Sibirī“, KUUP COFFEE, grupa „Bez PVN“ i cyti. Par myuža īguļdejumu latgalīšu kulturys atteisteibā tyka gūdynuots tieļnīks Indulis Folkmanis.

 

Koč ari goda suokumā izskanēja švuorbys par „Boņuks 2019“ byušonu, pasasokūt Latvejis Republikys Kulturys ministrejis, sabīdreibys i organizaceju atbolstam, ari itūgod Latgolys viestnīceibai GORS beja vareiba sareikuot Latgalīšu kulturys goda bolvys „Boņuks“ ceremoneju. Kasgadejuo nūtikšona našaubeigi ir goda svareiguokuo latgaliskuos kulturys sasatikšona, kurā sūpluok atsavēršonai iz pārnejū godu i bolvu sajiemieju gūdynuošonai, teik paruodeita ari ituos šaļts latgaliskuos kulturys situaceja i tendeņcis, kai ari dzymst idejis i sadarbeibys jaunim dorbim. Nasaverūt iz ituo breiža satraukumu par latgalīšu literaturys i izdeviejdarbeibys situaceju, taišni „Boņuks 2019“ bolvu pretendentu lūks kategorejā „Volūda. Literatura. Publicistika“ izaruodeja vysaspieceiguokais. Taipat itūgod cīši labi īsazeimēja bolvys geografiskais grīzums – tei na tik regiona aktivitate, bolvai nomināti latgaliskī dorbi i aktivitatis, kuri rūnās voi viestej par latgaliskū ari cytūs Latvejis regionūs, gon ari Īrejā, ASV, taipat i Sibirī.

 

Latgalīšu kulturys goda bolvys „Boņuks 2019“ muola statuetis par padareitū 2019. godā sajēme (alfabeta parādā):

 

Dokumentals stuosts par kordirigentis Terēzis Brokys myužu „Aiz azara bolti bārzi…“

Gruomota ir dokumentals stuosts par dirigentis i pedagogis Terēzis Brokys dzeivi i īguļdejumu Latgolys i Latvejis kulturvidis saglobuošonā i atteisteišonā. Izdavums radeits sasadorbojūt Daugovpiļs piļsātys dūmis Kulturys puorvaļdei i literatei Annai Rancānei.

Video par bolvys sajiemieju: https://youtu.be/jDtPlr0cLTE

 

Dokumentaluo filma „Latgalīši Sibirī“

„Latgalīši Sibirī” ir stuosts par myusu tautīšim, kuri par sovu sātu sauc Sibiri. Filma atkluoj, kas latgalīšus ir nūveds iz tuolū zemi, paruodūt ari Stolipina reformys ītekmi iz latgalīšu izbraukšonu vaira nikai pyrma symta godu, Transsibira dzelža ceļa taiseišonys ītekme iz izceļuošonys vareibu, braukšona burlakūs i tuos symta godu vacs atstuostejums, Stalina represeju skortī latgalīši i cytys ar Sibiri i latgalīšim saisteitys epizodis. Filmu var nūsavērt ite: https://youtu.be/-34sM3I2XRU

Video par bolvys sajiemieju: https://youtu.be/QgfmWzsJRnk

 

Egita Kancāne. Stuostu kruojums „Syltuo mola“

Stuostu kruojums „Syltuo mola” ir autoris debeja latgalīšu literaturā. Dalieji autobiografiskī stuosti ir nalelys sadzeivis ainenis par treju paaudžu sadzeivuošonu Vuorkovys nūvoda Andeņu cīmā. Tai kai darbeiba nūteik 80. i 90. godūs, tys ir sova veida pīminieklis vītai, tuo laika nūtykumim i cylvākim.

Video par bolvys sajiemieju: https://youtu.be/elPl0iC_UgM

 

Evalda Vasilevska pīminis izstuode i gruomota „Evalds Vasilevskis“

2018. godā myužeibā nūguoja Latgolys pūdnīks Evalds Vasilevskis. 2019. goda rudinī i zīmā Daugovpiļs Marka Rotko muokslys centrā beja apsaverama pūdnīkam veļteituo izstuode, kurys atkluošonā tyka prezentāta muokslys zynuotneicys Evijis Vasilevskys Evaldam veļteituo gruomota-izdavums par Vasilevska dzeivi, dorbu i īguļdejumu Latgolys pūdnīceibā, kai ari dorbu retrospekceja i školnīku, draugu i laikabīdru atminis.

Video par bolvys sajiemieju: https://youtu.be/q4m1yR3hPFY

 

Grupys „Bez PVN“ dzīsmis, video i koncerts „Rūbeži“

2019. godā grupa atruodēja divejis dzīsmis i muzykys videoklipus „Nabyus baiss(t)” i „Apveļc!”, bet goda golvonais nūtykums grupai beja lelais koncerts „Rūbeži” Latgolys viestnīceibys GORS Lelajā zālē, iz kuru beletus navarieja dabuot jau mienesi pyrma poša nūtykuma. Koncerta videoīroksts ite: https://youtu.be/8zR0ewe2bNo

Video par bolvys sajiemieju: https://youtu.be/34YhBZDDZ4U

 

Inta Viļuma i izdavums „Dagdys nūvoda pyura skreinis gruomota“

Inta Viļuma ir Dagdys nūvoda folklorys centra vadeituoja, kura vysa goda garumā aktivi struodoj pi Dagdys tradicionaluos kulturys populariziešonys i gūdā ceļšonys. 2019. godā, pasasokūt folklorys centra aktivitatei, Namaterialuo kulturys montuojuma sarokstā tyka īkļauta maja dzīduojumu pi krystim tradiceja Dagdys nūvodā, bet vīns nu svareiguokajim dorbim – izdūta „Dagdys nūvoda pyura skreinis gruomota” – izzynūšs materials par Latgolys tradicionaluos kulturys vierteibom Dagdys nūvodā.

Video par bolvys sajiemieju: https://youtu.be/vgoV1EkCkYc

 

KUUP COFFEE. Saiminīki Oskars i Jolanta Maculeviči

2018. goda rudinī Rēzeknis nūvoda Lendžūs, atsagrīžūt nu Reigys, Oskars i Jolanta Maculeviči sataiseja specializātuo kopeja grauzdātovu „KUUP COFFEE”, kurei pīduovoj treis dažaidys Latgolā grauzdāta kopeja garšys – „Kolumbejis flirts”, „Jezupa Etiopejis sapyns” i „Brazilejis nakts”. Latgaliskais itymā gadejumā nav viņ nūsaukumi, bet ari kopeju stuosti i pošu saiminīku viestejums par kopeju i Latgolu intervejuos i raidejumūs. Niu Lendžu kopejs ir vīns nu popularuokūs suveniru, kū nūvest, braucūt gostūs nu Latgolys. Vaira par kopeja grauzdātovu ite: http://www.kuup.lv/.

Video par bolvys sajiemieju: https://youtu.be/cioc_na-I1Y

 

Latgalīšu filantrops Pīters Aloizs Ragaušs

ASV dzeivojūšais latgalīts, uzjiemiejs i Latvejis gūda konsuls Teksasā Pīters Aloizs Ragaušs jau vairuoku godu garumā finansiali atbolsta Latgolai i latgaliskajai kulturai svareigus projektus, Hjustonā aktivi uztur latgaliskū i latvyskū goru, kai ari ASV popularizej latgaliskū kulturu. Ar Pītera atbolstu pārn izdūta Juoņa Cybuļska gruomota „Patīseiba ir myusu!”, dybynuota LU stipendeja Latgolys studentim, paleidzāts V. Lōča muzeja ceļtnīceibys dorbūs i dareiti cyti dorbi.

Video par bolvys sajiemieju: https://youtu.be/-JerS5mxqF0

 

Ligija Purinaša. Dzejis kruojums „Sīvīte“

Dzejis kruojums „Sīvīte” ir autoris debeja kruojums, kas viestej na viņ personeigū, bet ari Latgolys 20. g. s. sīvīšu stuostu. Gruomotā ilustracejis veiduotys nu 20. g. s. uzjimtajim sīvīšu portretim, daškierūt tim jaunu, myusdīneigu skatejumu. Dzejis kruojums atkluoj jaunys sīvītis skatejumu iz nūtikšonom Latgolā, kulturā, pasaulī, kas sasavej ar skorbu, osu mirkļa fiksaceju, realitatis atspeidumu. Leidz ar dzejis kruojuma prezentacejom, muzike Dana Vasiļjeva radeja dzīsmis ar Ligijis dzeju.

Video par bolvys sajiemieju: https://youtu.be/NB3B12sKLfA

 

Žurnaliste Ausma Sprukte

Ausma Sprukte jau sešus godus struodoj Latgolys Regionalajā televizejā i vysu tūs godu garumā cīši ryupejās par tū, kab latgalīšu volūda byutu radzama i dzierdama ari TV ekranūs. 2019. godā Ausma turpynuoja viesteit par nūtikšonom Latgolā latgaliski, veiduoja pyrmū TV raidejumu bārnim latgaliski „Žik!”, kai ari suoce taiseit sižetus Latvejis Radejis raidejumam „Kolnasāta”.

Video par bolvys sajiemieju: https://youtu.be/jRzEkCJOtmU

 

 

Par myuža īguļdejumu latgalīšu kulturys atteisteibā tyka gūdynuots tieļnīks Indulis Folkmanis.

Vaira par myuža īguļdejuma bolvys sajiemieju ite: https://latgalesgors.lv/lv/godinas-induli-folkmani, video ite: https://youtu.be/6EwLhcOmxAU

 

Latgalīšu kulturys ziņu portala lakuga.lv skaiteituoju simpateju bolvu „Žyks“ ūtrū godu piec kuortys sajēme etnografiskūs tārpu darynuotuoja i školuotuoja Iveta Seimanova. 2019. godā Iveta Seimanova struoduoja pi Preiļu burnasa (sīvīšu gūda mieteļa) atdarynuošonys piec muzeja materialu, taipat atdzymšonu pīdzeivuojuse ari Rudzātu sīvys capure. Pārn dybynuota ari „Latgolys etnografiskuo viestnīceiba”, kura īspieja nūorganizēt vasalys treis izstuodis, caur lelem īpazeistynojūt ar tautystārpu.

Ar visu 30 balvas nominantu sarakstu var iepazīties te: https://bonuks.lv/bonuks-2019/

 

„Boņuks 2019“ bolvu padūšonys ceremonejis vadeišona itūgod uzticāta jaunajim vadeituojim – Laurim Zalānam (Ghetto Games” personeibai aba vīnkuoršajam latgalīšam) i Armandam Buļam (uorstam i jaunajam hip-hop muokslinīkam Būrs). Bolvys laureati sajieme nu Latvejis Republikys kulturys ministra Naura Puntuļa, muziķa i radejis personeibys Ērika Zepa, tekstilmuokslineicys Anneles Slišānis, LTV raidejuma „Kultūrdeva“ produceņtis i vadeituojis Kristīnis Komarovskys, grupys „Borowa MC“ muziķa Aigara Runča, Rēzeknis piļsātys dūmis prīšksādātuoja Aleksandra Bartaševiča, TV raidejumu vadeituojis, muokslinīka Jura Soikana, kura dorbi caurveja ceremonejis scenografeju, mozmeitys i fotografis Dagmarys Legantis-Celmenis, Ludzys handbola komandys „Latgols“ jaunūs spālātuoju, kordirigentis Andys Lipskys, Latgolys viestnīceibys GORS vadeituojis Diānys Zirninis i aktera Gundara Āboliņa rūku.

 

Ceremonejā uzastuoja postfolklorys grupa „Rikši“, grupa „Bez PVN“, veiru kors „Graidi“ ar fragmentim nu izvaduma „Dzeivis graidi“, folklorys kūpa „Upīte“ i Rēzeknis nūvoda i J. Ivanova Rēzeknis muzykys vydsškolys orkestris, muzike Dana Vasiļjeva, folklorys kūpa „Ilža“, hip-hop muokslineica Ūga („Ausmeņa Records“), hip-hop apvīneibys MKH41 puorstuovs Bruolāns, kai ari, ļaunūt pasakavēt filmys „Piļsāta pi upis“ skaniejumā, dzīduotuojs Jānis Kurševs. Bolvu tīšraidē varēja viertīs lītuotnē „LMT straume, ceremonejis īroksts daīmams ite: http://straume.lmt.lv/lv/kultura/kultura/bonuks-2019/1051069

 

Žurejis komisejā, izviertejūt pretendentus „Boņuks 2019“, itūgod dorbuojās 52 latgaliskuos kulturys puorzynuotuoji, īprīškejuo goda bolvu sajiemieji, medeju puorstuovi, bolvys reikuotuoju puorstuovi, latgaliskuos kulturys sabīdryskī aktivisti i attīceigūs sferu pīaicynuotī eksperti. Latgalīšu kulturys goda bolvys mierkis ir apkūpuot lobuokū, spylgtuokū i svareiguokū padareitū i nūtikšonys pārnejā godā latgaliskajā kulturā, gūdynuot aktivuokūs latgalīšu kulturys puorstuovus, popularizātuojus, kai ari veicynuot i rūsynuot jaunradis i kulturys daudzveideibys atsateisteišonu iz prīšku. „Boņuks 2019“ gūdynuos par sasnāgumim i padareitū 2019. godā.

 

Latgalīšu kulturys goda bolva „Boņuks“ pyrmū reizi tyka padūta 2009. godā, bet nu 2013. goda bolvu reikoj Latgolys viestnīceibys GORS komanda. Bolvys nūtikšonu atbolsta Latvejis Republikys Kulturys ministreja, Vaļsts kulturkapitala fonda Latgolys kulturys programa ar A/S „Latvijas valsts meži“ i Latgolys regiona atteisteibys agenturys atbolstu, kai ari Rēzeknis piļsātys dūme, Bolvu nūvoda, Ciblys nūvoda, Dagdys nūvoda, Kuorsovys nūvoda, Leivuona nūvoda, Ludzys nūvoda, Preiļu nūvoda, Rēzeknis nūvoda, Rībeņu nūvoda, Viļakys nūvoda i Viļānu nūvoda pošvaļdeibys, bīdreiba „Partitura“, A/S „Latvijas Mobilais telefons“, latgalīšu kulturys ziņu portals lakuga.lv, Latvejis Radio Latgolys studeja, žurnals „IR“, muzejs „Andrupenes lauku sēta“, biedrība „Latgolys Studentu centrs“, žurnals „A12“, „KUUP COFFEE“, zemnīku saimisteiba „Liepkalns“, „Latgolys šmakovka“ Malnovā i kopejnīca „ZĪDS“. Vaira par bolvu: http://bonuks.lv un http://latgalesgors.lv.

 

Soki sovu

This site uses Akismet to reduce spam. Learn how your comment data is processed.