Šudiņ Rēzeknē, Latgolys viestnīceibā GORS, nūtyka svineiguo Latgalīšu kulturys goda bolvys „Boņuks“ padūšonys ceremoneja, kurymā bolvys sajēme desmit aktivuokī, spylgtuokī i plotuokū rezonaņsi dabuojušī latgaliskuos kulturys nūtiksonys, personeibys, projekti 2018. godā. Bolvys sajēme Anna Rancāne, grupa „Bez PVN“, apvīneiba „Latgalīšu Reps“, Annelis Slišānis projekts #100dečiLatvijai, raidejums „Dzirdi balsis ar Kārli Kazāku“, Ontona Slišāna jubileja gods Zīmeļlatgolā i cyti. Par myuža īguļdejumu latgalīšu kulturys atteisteibā tyka gūdynuots muokslinīks Osvalds Zvejsaļnīks.

Īīmūt jaunā godu desmitē, tyka maineits bolvys nūlykums i itūreiz bolvu sajēme desmit (pārn tī beja ostoņpadsmit) latgaliskuos kulturys akativitatis, nūtikšonys i personeibys, kai ari vīns bolvys „Par myuža īguļdejumu latgalīšu kulturys atteisteibā“ sajiemiejs. „Boņuks“ vēļ arviņ ir vīneiguo bolva, kas eipaši izceļ i gūdynoj sasnāgumus i padareitū latgaliskuos kulturys dzeivē. „Boņuks 2018“ muola statuetis par padareitū 2018. godā sajēme:

Aija Īzāka, „Teksasys latgalīši” – albums „Dvieselis steigys”

Albumā „Dvieselis steigys” apkūpuotys labi zynomys latgalīšu i latvīšu melodejis jaunā akademiskā, instrumentalā skaniejumā, īkļauti ari pasauļa klasikys dorbi. Albumu īrakstejuse muzykaluo apvīneiba „Teksasys latgalīši” i vejūļneica, ASV dzeivojūšuo kuorsovīte Aija Īzāka. Albums ir duovona Latvejis symtgadē, tuo prezentacejis koncerti ar Aijis pīsadaleišonu nūtyka Rēzeknē, Daugovpilī i Reigā.

Video par bolvys sajiemieju: https://youtu.be/7wnaOqI2y58

Anna Rancāne, kruojums „Prīca i klusiešona”

Annys Rancānis dzejis i eisprozys gruomota “Prīca i klusiešona” ir dzejneicys ostoitais kruojums, kas izguojs piec sešu godu ilgys pauzis. Vizuali kruojumu papyldynoj i boguotynoj Gundegys Rancānis gleznys. Gruomotā sūpluok teksti labi sadzeivoj gon latgalīšu, gon latvīšu rokstu volūda. Gruomotu izdavuse bīdreiba „Latgolys Studentu centrs”.

Video par bolvys sajiemieju: https://youtu.be/Lnqr_iciY-E

Annele Slišāne – projekts #100dečiLatvijai. Izstuodis i gruomota

Audieja Annele Slišāne tekstilmuokslys i literaturys projektu #100dečiLatvijai aizsuoce jau 2016. godā, tok 2018. godā tyka pabeigti vysi 100 deči i izdūta ari gruomota, kurā atkluots kotra deča topšonys stuosts. Nu dažaidu naparostu materialu veiduotī deči apceļuojuši vysu Latveju, atkluojūt autoris pasauļa redziejumu i latgalīšu volūdys šmukumu.

Video par bolvys sajiemieju: https://youtu.be/fOuO_o6Pd5I 

Apvīneiba „Latgalīšu Reps”

Hip hopa apvīneiba “Latgalīšu Reps” 2018. godā tyka na tikai par Latgolys, bet vysys Latvejis muzykys sensaceju. Apvīneiba nūfiļmiejuse treis videoklipus i izdavuse debejis albumu “Žārei gaļi”, izastuojuse koncertūs vysā Latvejā. Albuma tytuldzīsmei “Žārei gaļi” vītnē Youtube ir vaira nakai 700 000 skatejumu, kai ari Latvejis Radejis 5 Latvīšu muzykys top 20 dzīsme nūsaturēja gondreiž 4 mienešus.

Video par balvas sajiemieju: https://youtu.be/7gJUzke_KE4

Dokumentaluo kina „Latgalīši Pīterpilī”

Dokumentaluo kina „Latgalīši Pīterpilī” ir stuosts par latgalīšu Nacionalū atmūdu Krīvejis imperejis golvyspiļsātā Sanktpīterburgā aba Pīterpilī 19. g. s. beiguos i 20. g. s. suokumā. Kina taiseita popularzynuotniskuos žurnalistikys žanrā, kadri uzjimti gon Krīvejā, gon Latvejā. Kinu taisejuse bīdreiba „Kukuži”. Kinys video: https://youtu.be/zwsrhZqx2BE

Video par bolvys sajiemieju: https://youtu.be/ZlSeJZebJ8k

Dzejnīka i sabīdryskuo darbinīka Ontona Slišāna 70 godu svieteišona Zīmeļlatgolā. #OntonamSlišānam70

Vysa 2018. gods garumā ar dažaidom latgaliskom nūtikšonom tyka svieteits dzejnīka, folklorista i sabīdryskuo darbinīka Ontona Slišāna (1948–2010) 70 godu jubilejs. Svineibu ītvorūs izdūta gruomota „Vuss apleik maņ munā volūdā skaņ”, kurymā apkūpuoti bārnim veļteiti dzejūļi nu 15 Ontona Slišāna gruomotu.

Video par bolvys sajiemieju: https://youtu.be/C6xxrCMs9nI

Dzīšmu gruomota i CD bārnim „Zalta puče”

Dzīšmu gruomotā „Zalta puče” īkļautys latgalīšu dzīsmis ar natradicionalu notu pīrokstu. Izdavuma idejis autore ir klavesiniste i mama Ieva Saliete. Gruomotai kluot dalykts ari CD, kurā dzieržamuos dzīsmis īdzīduojuši folklorys kūpys „Vīteri” dalinīki. Gruomotys ilustracejis veiduojuse Ērika Māldere, izdavuse bīdreiba „Partitūra”.

Video par bolvys sajiemieju: https://youtu.be/AgOQIOC_4ko

Grupa „Bez PVN”

Grupai “Bez PVN” 2018. gods beja vīns nu aktivuokūs i radzamuokūs grupys pastuoviešonys laikā. “Bez PVN” dzīsmis tyka atskaņuotys dažaiduos Latvejis raidstacejuos, grupa gasteja televizejis i radejis raidejumūs. Video dzīsmei “Eņgeli sviļpoj” Youtube kanalā savuocs vaira na kai 120 000 skatejumu. Ar koncertim grupa klauseituojus prīcēja dažaiduos Latvejis vītuos.

Video par bolvys sajiemieju: https://youtu.be/Ele3quNImVM

Kārlis Kazāks. Raidejums „Dzirdi balsis ar Kārli Kazāku” par Ludzys izlūksni

Raidejums „Dzirdi balsis ar Kārli Kazāku” atkluoj latvīšu volūdys izlūkšņu skaistumu. Vīnā nu raidejumu tuo vadeituojs muzikis Kārlis Kazāks gasteja Ludzys pusē, kab īsaklauseitu tuos apleicīnis bolsūs. Īpazeistūt Ludzys izlūksni, Kārlis Kazāks kūpā ar hip hopa apvīneibu „Latgalīšu Reps” radeja dzīsmi „Bolta lopa”.

Video par bolvys sajiemieju: https://youtu.be/0lTDasdfXhQ

Koncepts „Nameiz”, Jānis Skutelis i „Benji Knewman”

Īsadvesmojūt nu kinys „Nameja gredzens”, šovā „Pusnakts šovs septiņos ar Jāni Skuteli” topa parodijvideo „Nameiz”, kas dabuoja plotu īviereibu interneta lītuotuoju vydā, sovaižuokā veidā popularizejūt latgalīšu volūdu. Piečuok, sasadorbojūt ar gruomotžurnala „Benji Knewman” dizaina preču lineju, puortopa T-kraklūs i džemperūs „Nameiz”, kurus kasdīnys volkuošonā izavielej daudzi interesenti, sovā veidā lepojūtīs i aplīcynojūt latgaliskū pīdereibu.

Video par bolvys sajiemieju: https://youtu.be/XKFaEQpSMv4

Par myuža īguļdejumu latgalīšu kulturys atteisteibā tyka gūdynuots muokslinīks Osvalds Zvejsaļnīks.

Ar vysu 30 balvys nominantu sarokstu var īsapazeit ite: https://latgalesgors.lv/lv/noskaidroti-bonuks-2018-nominanti

Plašāk par mūža ieguldījuma balvas sajiemieju te: https://latgalesgors.lv/lv/bonuks-2018-osvaldam-zvejsalniekam, video ite: https://youtu.be/0QtOdBkY_EU

Latgalīšu kulturys goda bolvys „Boņuks 2018“ ceremoneju vadeja Latvejis Radejis raidejuma „Kolnasāta“ vadeituojs, postfolklorys grupys „Rikši“ muzikis Ēriks Zeps i LTV šova „Supernova“ finalists, improvizators Kozmens (Mārtiņš Kozlovskis), nakluotīnē paleidzūt komikim Juoņam Skutelim, bet nūtikšonu boguotuoku dareja muziķu prīšknasumi, kurūs vydā ari eipašys sadarbeibys i puorsteigumi. Ceremonejā uzastuoja apvīneiba „Latgalīšu Reps“, grupa „Baritoni“, folklorys kūpa „Vīteri“, Arnis Slobožanins, etnografiskais ansamblis „Vabaļis“, „Misters&Nospiedumi“ i „Ausmeņa Records“ puorstuove Ūga, grupa „Lata Donga“, Aija Īzāka i „Teksasys latgalīši“, kai ari latgaliski pyrmū reizi dzīduoja ari grupa „The Sound Poets“. Ceremoneju varēja vērtīs na tik kluotīnē, Latgolys viestnīceibys GORS Lelajā zalā, bet ari tīšraidē, kū nūdrūsynuoja lītuotne „LMT Straume“, kurā kotram grybātuojam daīmams ari ceremonejis video īroksts http://straume.lmt.lv/lv/kultura/kultura/bonuks-2018/1037645.

Bolvys „Boņuks 2018” žurejis komisejā viertejumus par pretendentim snēdze vaira nikai 30 žurejis komisejis lūcekli – latgaliskuos kulturys puorzynuotuoji, medeju puorstuovi, bolvys reikuotuoju puorstuovi i attīceigūs sferu pīaicynuotī eksperti. Komisejā dorbuojās: muzikis i latgaliskūs projektu vadeituojs Guntis Rasims, tradicionaluos kulturys eksperte Ruta Cibule, komponiste, bolvys puorstuove Ilona Rupaine, literturzynuotneica, Latvejis Republikys Izgleiteibys ministre Ilga Šuplinska, izgleiteibys darbineica Aelita Andrejeva, literate Līga Rundāne, volūdneica Lideja Leikuma, etnomuzikologe Asnate Rancāne, grupys „Galaktika“ daleibnīks Normunds Zušs, režisore Inese Mičule, Latvejis Radejis kora muokslinīcyskais vadeituojs Sigvards Kļava, radejis Pieci.lv personeiba i dīdžejs Toms Grēviņš, režisors Viesturs Kairišs, Latvejis Nacionaluo kulturys centra vadeituoja Signe Pujāte, žurnalists i melomans Kaspars Zavileiskis, dzejneica i žurnaliste Anna Rancāne, portala lakuga.lv redaktore Vineta Vilcāne, Latvejis Radejis Latgolys studejis vadeituoja Renāte Lazdiņa, Latvejis Radejis 2 personeiba Roberts Buivids, Latvejis Televizejis golvonuo satura redaktore Anna Platpīre, Latvejis Radejis Ziņu dīnasta Multimedialuo satura producente Justīne Savitska, latgalīšu kulturvidis aktivists Juris Viļums, uzjiemiejs Valters Murāns, muzykys izdeviejs i dzīšmu autors Guntars Račs, Latgolys planavuošonys regiona puorstuovs Oskars Zugickis, muzikis i uzjiemiejs Jurs Vucāns, bolvys reikuotuoju puorstuove, latgaliskūs projektu vadeituoja Edīte Husare, literats i muzikis Oskars Orlovs, bankys „Citadele“ puorstuove Ligita Magiča, tekstilmuokslineica Annele Slišāne, Latgolys regionaluos televizejis puorstuove Ausma Sprukte, Latgolys žurnala „A12“ redaktore Ināra Groce, žurnaliste i volūdneica Maruta Latkovska, Latvejis Republikys Kulturys ministrejis parlamentaruo sekretare Marika Zeimule i Latgolys viestnīceibys GORS vadeituoja Diāna Zirniņa.

Latgalīšu kulturys goda bolva „Boņuks“ pyrmū reizi tika padūta 2009. godā, bet nu 2013. goda tū reikoj Latgolys viestnīceibys GORS komanda. Latgalīšu kulturys goda bolvys „Boņuks“ mierkis ir apkūpuot lobuokū, spylgtuokū i svareiguokū padareitū i nūtikšonys pārnejā godā latgaliskajā kulturā, gūdynojūt aktivuokūs latgalīšu kulturys puorstuovus, popularizātuojus, kai ari veicynojūt jaunradis i kulturys daudzveideibys atteisteibu iz prīšku. „Boņuks 2018“ teik gūdynuotys tuos personeibys, nūtikšonys i aktivitatis, bez kurūs vysvaira nabyutu īsadūmojama latgaliskuo kultura 2018. godā.

Latgalīšu kulturys goda bolvys „Boņuks 2018“ reikuotuojs ir Latgolys viestnīceiba GORS, tuos nūtikšonu atbolsta Vaļsts kulturkapitala fonds, Latgolys kulturys programa ar Vaļsts kulturkapitala fonda i AS „Latvijas valsts meži“ atbolstu, Rēzeknis piļsātys dūme, Bolvu, Dagdys, Kuorsovys, Ciblys, Preiļu, Rēzeknis, Viļakys i Viļānu nūvoda pošvaļdeibys, bīdreiba „Partitūra“, latgalīšu kulturys ziņu portals lakuga.lv, Latvijas Radejis Latgolys studeja, „Latgales ziedi“ i lītuotne „LMT Straume“. Vaira par bolvu: http://bonuks.lv i http://latgalesgors.lv.