Svineigā ceremonejā, kū sastdīnis, 5. marta, vokorā Latgolys viestnīceibā GORS apmekliejuši kluotīnis skateituoji, kai ari transliejuse Latvejis Televizeja, gūdynuoti 10 Latgalīšu kulturys goda bolvys “Boņuks” sajiemieji – spylgtuokuos i nūzeimeiguokuos nūtikšonys i personeibys 2021. godā, kai ari bolva par myuža īguļdejumu padūta kordirigentam Juoņam Grudulam.

 Latgalīšu kulturys goda bolvu “Boņuks” par padareitū pārņ sajiems projekts #100dečiLatvijai digitalā, taktilā, audio-vizualā i zeimu volūdā, Bolvu nūvoda zeime latgaliski, folklorys kūpa “Vīteri” i video stuosts “Teika par Rēzeknes Rozi”, gruomota i muzykys albums bārnim “Vuškeņa iz pļovys”, grupa “Latgalīšu Reps” ar albumu “Cyta dzela” i videoklipim, Ilzis Spergys stuostu kruojuma “Dzeiveiba” radejis lasejumi, literate i redaktore Ilze Sperga, Marijis Dzeislys dzejūļu kruojums “Vysta smierts”, navigacejis aplikaceja “Waze” latgaliski i pyrmuo izalauzšonys ustoba latgaliski “Pīci panti”.

Par publikys simpatejis bolsuojuma bolvys, kuruos nūtikšonu organizēja latgalīšu kulturys ziņu portals lakuga.lv i Latvejis sabīdryskūs medeju portals lsm.lv i kurā par sovu simpateju varēja bolsuot sevkurs grybātuojs, – “Žyka” – sajiemieju palyka īrokstu studeja “Bigmaar’s Records”.

Ceremonejis organizatori – Latgolys viestnīceibys GORS komanda – pastreipoj, ka eistyn prīcojās kai par latgaliskajā kulturā boguotū 2021. godu, tai par vareibu ituo gods bolvys padūšonys ceremoneju aizvadeit kluotīnē, sasateikūt ar skateituojim GORĀ!

Bolvys padūšonys ceremoneju vadeja komikis Juoņs Skutelis. Skateituojus kluotīnē i tīšraidē TV prīcynuoja grupys “Bez PVN”, “Muosys”, “Jakob Noiman Band”, “Varang Nord”, “Saucējas”, muzikis Ūga, Patrisha i Dināra Rudāne, kai ari koncertā “Celīs bruoļ!” radeits ansamblis, kurā apsavīnuojuši zynomi latgalīšu muziki.

“Boņuks 2021“ māla statuetes par padarīto 2021. gadā saņēma (alfabēta secībā):

Annelis Slišānis projekts #100dečiLatvijai digitalā, taktilā, audio-vizualā i zeimu volūdā i stuostu kruojums “Tuoraga stuosti”

Projekts “#100dečiLatvijai digitalā, taktilā, audio-vizualā i zeimu volūdā”, īkļaun audio stuostus, kai ari ļaun Annelis Slišānis symts unikalūs dečus īpazeit kai naredzeigajim caur pyrmū latgaliskū gruomotu, kas izdūta braila rokstā, tai nadzierdeigajim videogruomotā zeimu volūdā. Sovukuort gruomota “Tuoraga stuosti” apkūpoj treispadsmit eisūs stuostus par bīzpīnu, reizē – par sīvītem myusu dīnu sabīdreibā. Kūpā jī veidoj vīnuotu viestejumu par sīvītis ceļu pi seve, pi sovys byuteibys.

Video par bolvys sajiemieju:

https://www.youtube.com/watch?v=toyDF759Mo&list=PLFYJD0UVZBG68NRwaPn6TlQQ7xaoDgGUy&index=12

Bolvu nūvoda zeime latgaliski

Bolvu nūvodā 2021. godā pīdzeivuots viesturisks nūtykums latgalīšu rokstu volūdys byušonai publiskā vidē – pyrmū reizi Latvejis viesturē pastateita vaļsts leiminī saskaņuota nūvoda ceļazeime, kurā sūpluok uzrokstam latvīšu literarajā volūdā “Balvu novads” var puorskaiteit nūvoda nūsaukumu ari latgalīšu volūdā “Bolvu nūvods”.

Video par bolvys sajiemieju:

Folklorys kūpa “Vīteri” i video stuosts “Teika par Rēzeknes Rozi”

Rēzeknis bārnu i jaunīšu folklorys draugu kūpa “Vīteri”, raugūt atrast dažaidys cytys dorbuošonuos īspiejis pandemejis laikā, radejuši latgalīšu melodeju i dzīšmu caurveitu videostuostu legendai par Rēzeknis Rūzi.

Videostuosts skotoms ite: https://www.youtube.com/watch?v=5yqnOdQcbXg

Video par bolvys sajiemieju:

Gruomota i muzykys albums bārnim “Vuškeņa iz pļovys”

Jaunajā dzejūļu gruomotā bārnim “Vuškeņa iz pļovys”, kuruos izdeviejs ir bīdreiba “LgSC”, ir 15 Ilzis Spergys dzejūli, kū papyldynoj kruosainys i meilys Līgys Romančukys ilustracejis. Septenis jaunys dzīsmis ar Ilzis dzeju bārnim saceriejs Kristaps Rasims i īdzīduojuse grupa “Rupuči”.

Video par bolvys sajiemieju:

Grupa “Latgalīšu Reps” ar albumu “Cyta dzela” i videoklipim

Latgalīšu hiphopa grupa “Latgalīšu Reps” 2021.goda 19. martā izdavuse ūtrū studejis albumu ar nūsaukumu “Cyta Dzela”, tymā apkūpuotys 13 jaunys dzīsmis.

Nūsaukums “Cyta dzela” apzeimej grupys redziejumu – “Īmam sūli augšuok lobuokā kvalitatē i izpiļdejumā. Nikod nazynim, kas myus dzeivē sagaida, bet cikom nu gaisa nakreit akmini, dzeivē vyss ir kuorteibā, īmam iz prīšku, nasaverūt iz tū, ci myusim ir pasaveics ci nā.”

Video par bolvys sajiemieju:

Ilzis Spergys stuostu kruojuma “Dzeiveiba” radejis lasejumi

Nu 7. da 11. decembra kotru vokoru 22.05 Latvejis Radejis 1 eterā izskanēja pyrmī radejis lasejumi latgaliski – Ilzis Spergys kruojuma “Dzeiveiba” stuosti. Radejis lasejumu muokslinīcyskais vadeituojs ir Kristaps Rasims, bet stuostu klausamuos versejis golvonais bolss – Latvejis Nacionaluo teatra aktrise Inga Misāne-Grasberga.

Video par bolvys sajiemieju:

Literate i redaktore Ilze Sperga

2021. godā spylgta i ražeiga personeiba latgaliskajā kulturā beja literate, publiciste i projektu vadeituoja Ilze Sperga. Jei beja redaktore divejim nūzeimeigim literarim dorbim – Valentina Lukaševiča dzejis kruojumam “Pādi nava svāti” i Oskara Seiksta “Vokora vuordi draugim”. Taipat izguojuse juos pošys dzejis gruomota i dzīšmu albums bārnim “Vuškeņa iz pļovys” . Vīns nu goda nūzeimeiguokajim nūtykumim bejs ari Ilzis stuostu kruojuma “Dzeiveiba” puortopšona radejis lasejumu formatā, kas 2021. gods decembrī izskanēja Latvejis Radejis eterā i tyka par pyrmajim piļneibā latgaliskajim radejis lasejumim. Ilze poša bejuse aktiva ari ar jaunu dorbu publiciešonu – dabuojuse trešū vītu konkursā “Latgolys prozys skaitejumi 2021”, taipat vēļ da ituo napublicāta Ilzis stuosta fragments skanēja kai pīktuo pasauļa diktata latgalīšu rokstu volūdā teksts.

Video par bolvys sajiemieju:

Marijis Dzeislys dzejūļu kruojums “Vysta smierts”

Ar dzejūļu kruojumu-dzeislinīku “Vysta smierts” (‘vystys smierts’ i ‘vysa tei nuove’ – vuordu spēle) latvīšu literaturā īīt jauns, pošapzineigs i skaļs bolss – Marija Dzeisla.

Tys ir pseidonims, aiz kuruo nav juomeklej personeiba, bet gon plyustūša identitate, kas puorsamej atkareibā nu viestejuma i pat spiej puorsavītuot laikā. Autors, kurs sovu personeibu grib paturēt nūslāpumā, dzeislinīkā koncentrejās iz asameibu ite i tān, akcentejūt jū taidu, kaida jei veidojās sasaistē ar viesturi, dzymtu, vītu cauri laikim.

Video par bolvys sajiemieju:

Navigacejis aplikaceja “Waze” latgaliski

2021.goda pavasarī, puorvarūt vysaiduokus pandemejis izlyktūs apgryutynuojumus i starptautiskuos komunikacejis leiklūčus, Waze latgaliskuo verseja izalauze cauri škārsteikla labirintim i niu ir breivai daejama kotram kuļdinīka ci kaidys cytys gudruos īreicis lītuotuojam. Napylna goda laikā Waze latgaliskuo verseja ir īgivuse naskaitamys pozitivys atsauksmis. Ļauds tū lītoj, prīcojās i vys stuosta par itū aplikaceji citim!

Video par bolvys sajiemieju:

Pyrmuo izalauzšonys ustoba latgaliski “Pīci panti”

Bolvu nūvoda Upītē, slāgtuos školys sātā tika atkluota pyrmuo i cikom vīneiguo izalauzšonys ustoba-spēle latgaliski. Jaunajai izalauzšonys ustobai dūts nūsaukums “Pīci panti”, tei ir veļteita nūvodpietnīkam, dzejnīkam, folkloristam Ontonam Slišānam (1948–2010). Izalauzšonys ustobā “Pīci panti”, kab nu tuos tiktu uorā, byus juopadora pīci aizdavumi. Kotram aizdavumam ir pīmaklāts kaids Ontona Slišāna dzejūļs, kas vadynoj spālātuoju dūmys vajadzeigajā vierzīnī.

Video par bolvys sajiemieju:

Video par myuža īguļdejuma bolvys sajiemieju Juoni Grudulu:

Itūgod tyka īsnāgti 109 pretendentu dasacejumi, kurus izviertēja žurejis komiseja, tuos sastuovā īkļaunūt īprīkšejūs godu bolvu sajiemiejus, medeju puorstuovus, bolvys reikuotuoju puorstuovus, latgaliskuos kulturys sabīdryskūs aktivistus i attīceigūs sferu daaicynuotūs ekspertus, kuru kasdīna nav saisteita ar latgaliskū kulturu. Kai pretendentu viertiešonys kritereji ari itūreiz tyka izvierzeiti pretendenta snāguma kvalitate, aktivitate vysa goda laikā, regionā, vaļstī voi plašuokā mārūgā raiseituo rezonanse, latgaliskums i/voi Latgolys kulturys vierteibu nesšona, pretendenta ilgtspieja – ītekme iz latgaliskuos kulturys procesim iz prīšku.

Ar vysu 30 bolvys nominantu sarokstu var īsapazeit ite:https://www.latgalesgors.lv/lv/bonuks-2021-nominanti

Latgalīšu kulturys goda bolva “Boņuks” pyrmū reizi tyka padūta 2009. godā, bet nu 2013. goda bolvu reikoj Latgolys viestnīceibys GORS komanda, sasadorbojūt ar bīdreibu “Partitūra”. “Boņuks 2021” nūtikšonu atbolsta Vaļsts kulturkapitala fonda Latgolys kulturys programa ar A/S “Latvijas valsts meži” i Latgolys regiona atteisteibys agenturys atbolstu, kai ari Rēzeknis piļsātys dūme, Daugovpiļs piļsātys dūme, Leivuona nūvoda pošvaļdeiba, Kruoslovys nūvoda pošvaļdeiba i Rēzeknis nūvoda pošvaļdeiba, Latvejis Televizeja, latgalīšu kulturys ziņu portals lakuga.lv, Latvejis Radejis Latgolys studeja, SIA “Atrakcijas Sēlijā”, SIA “Latgales ziedi”, kopejneica ZĪDS, bīdreiba “LgSC”.

Vaira par balvu: http://bonuks.lv un http://latgalesgors.lv.